VOV4.Jarai - Khua mir sir ơi Nguyễn Xuân Phúc phrâo hơmâo mông bưp 45 čô mơnuih ba gru amăng khul bơwih ƀong sĭ mơdrô lĕ tơhan hơđăp, anai lĕ ƀing mơnuih pơ ala brơi mơnuih bơwih ƀong sĭ mơdrô lĕ tơhan hơđăp amăng đơ đam dêh čar ta. Pơ ala brơi khua mua Ping gah, Kơnuk kơna, Khua mir sir ơi Nguyễn Xuân Phúc pơpŭ bơni, lăng yôm khul grup hăng ding kơna amăng khul hơmâo tŏ ngă tui gru grua “Tơhan rơnuk wa Hồ”, hơmâo lu tơlơi pơgôp amăng bruă bơwih ƀong sĭ mơdrô laih dong hơdôm bruă hiam, tơlơi gơgrong djru mơnuih mơna hrŏm hăng Kơnuk kơna ta.

Khua mir sir ơi Nguyễn Xuân Phúc bưp mơnuih bơwih ƀong sĭ mơdrô lĕ tơhan hơđăp

Sit biă ñu, Khua mir sir pơtă pơtăn ƀing mơnuih bơwih ƀong sĭ mơdrô kiăng pơtrut pơđĭ kyar mơtah, mă yua boh thâo măi mok phrâo kiăng pơkra pơjing gơnam klă hloh, hơmâo lu bruă mă kiăng pơgôp pơgang anih dŏ hơdip jum dar jai hrơi hiam klă. Ƀing mơnuih bơwih ƀong sĭ mơdrô lĕ tơhan hơđăp kiăng tŏ tui gru grua tơhan rơnuk wa Hồ kiăng kơ ngă lar hyu pran khăp kơ lŏn ia mơng ƀing tơhan hơđăp truh pơ abih bang mơnuih, gir run mă pô, pơjing anom bơwih ƀong sĭ mơdrô pơđĭ kyar hơđong kjăp, djru pơgang hĭ klin Covid-19, pơhlôm rơnuk rơnua amăng lŏn ia Việt Nam.

Siu Đoan: Pơblang