VOV4.Jarai - Ƀơi ƀon prong Hồ Chí Minh, Khua mir sir ơi Nguyễn Xuân Phúc phrâo hơmâo mông bưp mơnuih ƀon sang ƀơi tơring glông Củ Chi hăng Hóc Môn, lăng nao rai amăng tivi, lăi pơhmư̆ bruă prăp lui kơ mông jơnum lok 2, Khua git gai pơ ala mơnuih ƀon sang dêh čar tal 15. Ƀơi mông bưp, mơnuih ƀon sang bơni kơ Ping gah, Kơnuk kơna, hơdôm anom bruă, mơnuih mơnam amăng dêh čar hăng dêh čar tač rơngiao hơmâo lăng ba, črâo bruă, djru ba ƀon prong Hồ Chí Minh pơgang klin đah mơng dưi pơgang tui ră anai. Khua mir sir ơi Nguyễn Xuân Phúc brơi thâo, Ding jum kơđi čar hơmâo lu mông jơnum ba tơbiă hơdră git gai Kơnuk kơna, Anom bruă git gai pơhlôm pơgang klin, amăng anun hơmâo bruă pơplih mơng “Zero Covid-19” jing dưi dŏ hrŏm rơnuk rơnua hăng Covid-19.

Khua mir sir ơi Nguyễn Xuân Phúc bưp mơnuih ƀon sang ƀơi ƀon prong HCM

Amăng hrơi blan pơ anăp, Khua mir sir dêh čar ta lăi, vaccine + 5K ăt jing hơdră pơgang klin klă hloh kiăo tui tơlơi thâo rơgơi pơgang klin mơng rŏng lŏn tơnah hăng Việt Nam. Hăng bruă ƀon prong Hồ Chí Minh amăng ƀrư̆ dưi pơgăn klin, Khua mir sir lăi lĕ, tơring glông Củ Chi hăng Hóc Môn kiăng lăng glăi, pơsir mơtăm hơdôm tơlơi aka ƀu rơđah đah mơng ngă gal brơi anom bơwih ƀong, anom ngă ƀong hrŏm hăng mơnuih ƀon sang pơphun glăi tơlơi bơwih ƀong, djru hơmâo bruă mă, hơmâo prăk kăk, pơhlôm tơlơi hơdip mơnuih ƀon sang.

Siu H’Mai: Pơblang