VOV4.Jarai-Tơdơi kơ čuă jơnum mơak klă gơyut gơyâo dêh čar Cuba, tlam lơ 20/9, tui mông pơ anun, jing mơguah sing bring tui mông Việt Nam, khua mir sir ơi Nguyễn Xuân Phúc nao pơ dêh čar Mi, jơnum bơkơtuai hrom khua mua pơprong tal 76 Sang gum hơbit djop dêh čar laih anun pơphun lu bruă mă dua bơnah hăng dêh čar Mi. Bruă mă yôm pơphăn anai kiăng pok brơi jơlan pơtom hiăp mơ̆ng Jơnum ruah khua ping gah dêh car ta tal XIII pơsit; pơtrut tui hăng pơđĭ hloh jơlan hơdră pơtom hiăp lu bơnah mơ̆ng Việt Nam truh thun 2030; pơdah rai tơlơi gơgrong, kơnuih hing ang hăng pơgôp prong amăng bruă mă mơ̆ng sang gum hơbit djop dêh čar hăng jar kmar.

Nao jơnum hrom hơmâo rơbêh 100 čô khua apăn akŏ dêh čar, khua mua amăng sang gum hơbit djop dêh čar tal 76 jing mông gêh găl klă pơphun bưp nao rai dua bơnah, lu bơnah tơdơi kơ sa rơwư̆ wang pơdơi hĭ yua klin covid 19. Khua mir sir ơi Nguyễn Xuân Phúc dŏ hơmâo lu bruă mă dua bơnah hăng dêh čar pơkŏn amăng sang gum hơbit djop dêh čar hăng dêh čar Mi, kiăng kơtưn bruă ngă hrom mơ̆ng dêh čar ta hăng gong gai kơnuk kơna djop dêh čar laih anun kơnuk kơna dêh čar Mi; pơtrut bruă ngă giăng mah gơyut gơyâo hlăk pơđĭ kyar hiam mơak; djơ̆ hăng tơhnal pơtrun, boh tŭ yua hrom mơ̆ng dua bơnah Việt Nam-Mi.

Nay Jek: Pơblang