VOV4.Jarai-Klăm mơmŏt lơ 17/11, Khua mir sir ơi Nguyễn Xuân Phúc nao jơnum mơak hrom mơnuih ƀôn sang phường Điện Biên, kuân Ba Đình, Hà Nội amăng Hrơi mơak Gum pơgôp djop djuai ania. Khua mir sir ơi Nguyễn Xuân Phúc bơni khua mua ping gah, gong gai kơnuk kơna hăng mơnuih ƀôn sang Phường hơmâo gir run, găn rơgao tơlơi tơnap tap amăng mông klin kheng ngă ră anai.

Khua mir sir ơi Nguyễn Xuân Phúc nao Jơnum hrơi mơak Gum pơgôp djop djuai ania phường Điện Biên, kuân Ba Đình, Hà Nội

Khua mir sir hok mơak lơ̆m ƀuh tơlơi hơdip mơda, pran jua mơak mơ̆ng mơnuih ƀôn sang Phường Điện Biên jai hrơi dưi đĭ tui, ƀu hơmâo sang anŏ ƀun rin dơ̆ng tah. Khua mir sir ăt rơkâo kơ mơnuih ƀôn sang phường hăng ƀôn prong Hà Nội pơđĭ tui tơlơi thâo hloh, prăp lui bruă pơhlôm pơgang klin kheng klă; pơtrut tui pran jua djru nao rai tơdruă, kah pơpha, gum hrom kiăngdưi găn rơgao hĭ tơlơi tơnap tap yua klin kheng ră anai.

Hlâo kơ anun, lơ̆m klăm lơ 17/11, ƀơi anom bruă khua mir sir, Khua mir sir ơi Nguyễn Xuân Phúc hơmâo bưp hăng čơkă khua mua hăng mơnuih arăng đăo kơnang, khua plơi tha ƀôn laih anun 1.300 čô mơnuih arăng đăo kơnang mơ̆ng tơring čar Bắc Kạn, nao čuă plơi prong jưh jom Hà Nội.

Nay Jek: Pơblang