VOV4.Jarai-Tlam lơ 18/8, ƀơi Hà Nội, Ping gah anom bruă kông an dêh čar, Ding jum kông an jơnum bưp ƀô̆ mơta hơdor glăi tal 76 thun hrơi gru grua tơhan kông an mơnuih ƀôn sang lơ 19/8 hăng jao mơđai djă gru Ping gah 40 thun, 30 thun ping gah kơ ƀing khua mua, khua mua hơđăp Ding jum kông an.

Khua mir sir đĭ pơhiăp amăng mông jơnum hơdor glăi tal 76 thun hrơi gru grua anom bruă kông an mơnuih ƀôn sang

Nao jơnum hrom hăng đĭ pơhiăp amăng mông jơnum, ơi Nguyễn Xuân Phúc Khua mir sir lăng yôm bruă mă mơ̆ng tơhan kông an mơnuih ƀôn sang amăng hơdôm thun rơgao bong glăi tơlơi pơmin soh sat, tơlơi pơkơdong glăi hăng ping gah, kơnuk kơna mơ̆ng ƀing ayăt roh, pơgang hơđong dêh čar. Laih dơ̆ng, tơhan kông an mơnuih ƀôn sang kơtưn ngă bruă pơkơdong glăi hăng lu tơlơi soh sat pơkŏn.

Khua mir sir ơi Nguyễn Xuân Phúc rơkâo Ping gah kông an dêh čar, Ding jum kông an ăt djă hnong pran jua thâo gum pơgôp, tŭ ư hrom, khut khăt ngă bruă tŭ yua tui jơlan hơdră mơ̆ng ping gah, tơlơi phiăn kơnuk kơna pơtrun kơ bruă mă pơgang tơlơi rơnuk rơnua dêh čar, pơgang hơđong mơnuih mơnam dêh čar.

Nay Jek: Pơblang