VOV4.Jarai-Tlam lơ 3/11, amăng hơdră jơnum hơdor glăi tal 190 thun akŏ pơjing tơring čar Lạng Sơn, Khua mir sir dêh čar ta ơi Nguyễn Xuân Phúc bưp, mă bruă hăng khua mua phun ƀơi tơring čar Lạng Sơn. Pơhiăp ƀơi mông jơnum, Khua mir sir lăng yôm biă mă tơring čar Lạng Sơn, mah amăng hrơi blan klin kheng kơtang samơ̆ ăt pok pơhai pơhlôm hlâo klă laih anun pơtrut pơđĭ kyar bơwih ƀong huă mơnuih mơnam, pơgang rơnuk rơnua lŏn ia.

Amăng anun, hơdôm tơhnal pơtrun hnong pơđĭ kyar, pơhrui prăk duh jia, sĭ mơdrô ăt pơhrui glăi tŭ yua djơ̆ hnong pơkă. Khă hnun, hơdôm tơhnal pơtrun, Khua mir sir dêh čar ta ăt pơtă pơtăn kơ tơring čar Lạng Sơn, kiăng pơtum pran kơtang mă bruă, ĕp prăk tuh pơ alin, mơnuih mă bruă, jơlan hơdră pơtrun, ană mơnuih mơnam pioh pơtrut pơđĭ kyar bơwih ƀong huă kơnang kơ klâo anŏ phun gơgrong kjăp tơlơi bơwih ƀong huă ƀơi Lạng Sơn, anun lĕ tơlơi bơwih ƀong huă ƀơi jơlan amăng jang guai dêh čar, anih bơwih ƀong huă čơkă tuai hyu ngui; bruă ngă hmua thâo rơgơi lir hơbit hăng bruă mă yua măi mok, tuh tia pơkra pơjing pioh sĭ mơdrô hăng tač rơngiao; kiăng pơgang kyâo glai, pơtrut tui anŏ gêh găl bơwih ƀong huă mơ̆ng glai rưng; mă yua anŏ gêh găl pla boh troh, pla phun kyâo ngă jrao.

Hrom hăng anun, ăt gir pơblih ngă klă pơgang anih dŏ jum dar tuh pơ alin sĭ mơdrô pioh kơ hơdôm khul grup mơnuih mơnam dŏ tơnap amăng tơring čar ngă hrom bơkơnar hăng khul grup amăng dêh čar.

Nay Jek: Pơblang