VOV4.Jarai - Ƀrô ngă lơphet 20 thun Hrơi pioh kơ Sang anŏ Việt Nam (28/6), Khua mir sir ơi Nguyễn Xuân Phúc hơmâo hơ-ơč hmưi, mơ-it tơlơi pơtă pơtăn kơ abih bang sang anŏ Việt Nam, amăng anun jak iâu rim sang anŏ kiăng yua kơ sa Việt Nam hrưn đĭ ataih hloh, kơjăp kơtang, pơdrong asah. Tơlơi pôr pơthâo hơmâo glông čih: “Amăng hrơi mông klin prong Covid-19 glăk kơtang amăng dêh čar ta, lu khua mua, ling tơhan, ơi ia jrao ƀu hŭi kơ glêh glar, hŭi rơhưč nao pơ anih hơmâo klin. Sit sang anŏ yơh ngă anih dưi gơnang, pơsur pran jua kiăng ƀing gơñu dưi găn rơgao tơlơi tơnap đah mơng dưi ngă klă bruă hơmâo jao. Lu sang anŏ gum djru pơčruh prăk kăk, brơi gơnam, juh alum pran jua, ngă gru hiam, iâu pơthưr abih bang mơnuih amăng sang ngă tui klă tơlơi pơtrun, gum hrŏm hăng Ping gah, Kơnuk kơna hăng abih bang anom bruă čar amăng bruă pơgang klin, kiăng Việt Nam jing anih rơđah bơngač hơmâo gơyut gơyâo ƀơi jar kmar bơni. Kâo rơkâo bơni kơ abih bang gưl ping gah, anom bruă, mơnuih mơnam ƀơi abih bang anih amăng dêh čar ta, mơnuih ƀon sang Việt Nam glăk dŏ pơ tač rơngiao hơmâo lu bruă ngă hiam, djru akŏ pơdong sang anŏ Việt Nam yâo mơ-ak, pơplih phrâo, pơđĭ kyar kơjăp”.

Siu H’Mai: Pơblang