VOV4.Jarai - Tŭ ư tơlơi jak iâu mơng Khua git gai Ping gah, Khua mir sir dêh čar Lao Thongloun Sisoulith, mơguah anai lơ 9/8, Khua mir sir ơi Nguyễn Xuân Phúc hrŏm hăng bơnai ñu ba jơlan khua mua mơng Việt Nam, tơbiă đuăi mơng Hà Nội nao čuă sit nik dêh čar Lao mơng lơ 9 truh lơ 10/8. Anai lĕ tal nao čuă dêh čar tač rơngiao sit nik blung a mơng Khua mir sir ơi Nguyễn Xuân Phúc lơ̆m ñu ngă bruă phrâo, pơdah tơlơi pơpŭ yôm mơng Ping gah, Kơnuk kơna hăng mơnuih ƀon sang Việt Nam hăng tơlơi rô nao rai yôm, ngă hrŏm abih bang Việt Nam - Lao.

Amăng tal nao čuă, ƀing khua hơmâo bơkơtuai kơ bruă pơtrut ngă hrŏm bruă čar, pơtom hiăp nao rai, biă ñu amăng hrơi glăk hơmâo klin Covid-19, kiăng ngă atur kơjăp kơ tơlơi rô nao rai dua bơnah amăng bruă sĭ mơdrô, tuh pơ plai, ling tơhan, rơnuk rơnua lŏn ia; gru grua boh thâo, ia jrao, pơtô pơjuăt; ngă hrŏm jar kmar, amăng kual anet prong. Tal nao čuă gum djă bong gru grua hiam mơng đưm hlâo, laih anun mơ-ak tui tơlơi rô nao rai kơplah wah Lao hăng Việt Nam.

Siu H’Mai: Pơblang