VOV4.Jarai-Tlam lơ 30/7, Khua mir sir ơi Nguyễn Xuân Phúc nao čuă hăng mă bruă ƀơi tơring čar Bình Dương kơ bruă pơhlôm, pơgang klin Covid 19. Khua mir sir lăi pơtong, Bình Dương lĕ tơring čar gơgrong yôm biă mă amăng bruă pơkra ming gơnam tam sĭ mơdrô mơ̆ng tơlơi bơwih ƀong huă Việt Nam, jing tơring čar hơmâo mơnuih dŏ jơngum, lu sang bruă sĭ mơdrô, sang măi, anih pơkra ming djop mơta gơnam sĭ mơdrô mơ̆ng kual Ngŏ dơnung hăng ƀôn prong Hồ Chí Minh, yua kơ anun bruă pơhlôm, pơgang klin bưp ƀu ƀiă ôh tơlơi tơnap tap.

Lăi mơ̆ Bình Dương ăt dŏ amăng hrơi mông hlăk gêh găl yôm, Khua mir sir pơtrun hiăp brơi phuă kơtang hloh dơ̆ng hơdră pơhlôm pơgang klin, boh nik ñu hơdôm sang bruă kơnuk kơna, anom bruă čar aka ƀu ngă djơ̆ hră pơčrâo trun mrô 15, 16 mơ̆ng Khua dêh čar, mơ̆ng anun kiăng pơgăn ƀiă mrô mơnuih ƀă klin laih anun huăi kơniă amăng sang ia jrao.

Khua mir sir pơtă pơtăn, ngă tui hơdră guang dar jơlan tơbiă hyu hăng pơčlah mơnuih mơnam, tơring čar anăm lui ôh mơnuih ƀôn sang ư̆ rơpa, duăm ruă mơ̆ ƀu hơmâo mơnuih lăng ba; khom pơtum lu mơnuih, djop sang bruă amăng tơring čar, djop plơi pla hăng mơnuih hơmâo pran jua čơmah kiăng gum tơngan hrom djru ba ană plơi pla ƀơi kual tơnap tap.

Nay Jek: Pơblang