VOV4.Jarai-Lơ̆m 12 mông lơ 26/11 tui hăng mông Việt Nam, Khua mir sir ơi Nguyễn Xuân Phúc hăng bơnai ñu ba jơlan hlâo khua mua mơ̆ng Việt Nam truh laih pơ tơdron rơdêh por jar kmar Geneve, čuă jơmư sit nik dêh čar Thụy Sĩ mơ̆ng lơ 25-29/11. Amăng hrơi blung a truh pơ Thụy Sĩ, tơdơi kơ ngă lơphet tŭ jum, Khua mir sir ơi Nguyễn Xuân Phúc jơnum bơkơtuai hăng Khua mir sir dêh čar Thụy Sĩ ơi Guy Parmelin; bưp Khua Khul git gai dêh čar Thụy Sĩ; nao jơnum bơkơtuai ƀing ngă bruă sĭ mơdrô Việt Nam hăng Thụy Sĩ.

Tal nao čuă jơmư anai, Khua mir sir nao čuă ƀôn prong Bern; čuă hăng bưp khua mua git gai kual ala čar Geneve; tŭ jum khua mua pơprong grup sĭ mơdrô dêh čar Thụy Sĩ; bưp mơnuih ƀôn sang Việt Nam ƀơi dêh čar Thụy Sĩ. Khua mir sir ăt amra bưp, mă bruă hăng anom bruă jar kmar, kah hăng Khua phun anom bruă sĭ mơdrô rŏng lŏn tơnah WTO, Khua phun anom bruă Khul ia jrao rŏng lŏn tơnah WHO, Khua phun anom bruă pơgang pơčeh phrâo ia rơgơi rŏng lŏn tơnah WIPO, khua khul bruă čưng boh lông rŏng lŏn tơnah FIFA.

Nay Jek: Pơblang