VOV4.Jarai - Tŭ ư hăng tơlơi jak iâu mơng Khua dêh čar New Zealand, Khua mir sir dêh čar ta ơi Nguyễn Xuân Phúc amra nao Jơnum khua mua APEC tal 28 dong mơng lơ 11 truh lơ 12/11 jơnum lăng nao rai mơng ataih. Amăng rơwang hrơi tơjuh jơnum APEC tal anai, Khua mir sir ơi Nguyễn Xuân Phúc amra nao jơnum hrŏm hăng đĭ pơhiăp amăng Jơnum khua mua anom bơwih ƀong sĭ mơdrô APEC hơmâo giăm 4.500 čô khua mua lĕ ƀing khua mua hơdôm anom bơwih ƀong sĭ mơdrô prong hloh amăng kual Asia - Thái Bình Dương; laih dong Jơnum hăng Khua mua bơwih ƀong huă amăng kual Asia - Thái Bình Dương tal 28 hăng anăn “Gum hrŏm hăng APEC kiăng pơtrut hơkrŭ glăi tơlơi bơwih ƀong huă tơdơi kơ pơgang hĭ klin Covid-19;

Hơdôm tơlơi dưi hăng tơlơi lông phun tơdơi kơ pơgang hĭ klin Covid-19 hăng ngă hiưm pă kiăng pơhlôm djă pioh hơdôm tơlơi dưi laih dong djru brơi abih bang mơnuih ră anai hăng pơgi kơdih”, đing nao pơčrông sai dua boh tơhnal lĕ bruă pơđĭ kyar bơwih ƀong huă amăng rŏng lŏn tơnah hăng ngă hrŏm hơkrŭ glăi tơlơi kơ abih klin. Jơnum him lăng amra pơsit 2 hră pơ-ar lĕ tơlơi lăi pơthâo mơng Jơnum khua mua bơwih ƀong huă kual Asia-Thái Bình Dương tal 28 hăng akŏ bruă pok pơhai hơdră bruă APEC truh thun 2040.

Siu Đoan: Pơblang