VOV4.Jarai - Amăng hơdôm bruă mă pioh hơdor glăi 60 thun hrơi Wa Hồ glăi čuă plơi pla tal 2 (8/12/1961 - 8/12/2021), lơ 12/12, ƀơi anih djă pioh gơnam yôm Kim Liên, să Kim Liên, tơring glông Nam Đàn, Nghệ An pơphun mông ngă lơphet pioh hơdor glăi 60 thun hrơi Wa Hô glăi čuă plơi pla tal 2 hăng pok sang pioh hơdor Khua mir sir Hồ Chí Minh amăng anih djă pioh gru grua yôm. Đĭ pơhiăp amăng mông ngă lơphet, Khua mir sir ơi Nguyễn Xuân Phúc brơi thâo, amăng rơnuk ngă hơkrŭ, Wa Hô yua kơ bruă čar lui hĭ bruă sang anŏ.

Ataih mơng plơi pla dong mơng thun 1906 truh pơ hrơi ñu jing khua git gai Ping gah hăng lŏn ia, Wa Hô glăi čuă plơi pla kơnong 2 wŏt đôč, samơ̆ ñu ăt pơdah tơlơi hning rơngŏt amăng hră mơ-it, tơlơi čih lăi nao plơi pla, hơdôm tal hiăp bih hăng mơnuih ƀon sang, ƀing apăn bruă Ping gah amăng tơring čar Nghệ An. Khua mir sir pơsit tong, Ping gah, Kơnuk kơna hăng mơnuih ƀon sang amra hơdor na nao hơdôm tơlơi gum pơgôp prong prin mơng amĭ ama, sang anŏ hăng kơnung djuai Wa Hô, lĕ ƀing mơnuih ƀă ƀem čem rông sa čô mơnuih rơgơi kơhnâo kơ lŏn ia Việt Nam, anai lĕ Khua mir sir Hồ Chí Minh kiăng khăp.

Siu Đoan: Pơblang