VOV4.Jarai - Tlam lơ 15/10, Khua mir sir ơi Nguyễn Xuân Phúc hơmâo ngă bruă hăng Khua mua Ping gah Sang phăt kơđi dêh čar. Pơhiăp ƀơi mông ngă bruă, Khua mir sir ơi Nguyễn Xuân Phúc pơsit sang phăt kơđi hơmâo ngă klă tơlơi jao bruă, phăt kơđi, ngă djơ̆ tơlơi phiăn, pơgang ba tơlơi djơ̆, tơlơi dưi ană mơnuih, tơlơi dưi mơng hơdôm anom bruă, mơnuih mơnam. Biă ñu anom bruă anai hơmâo pơsir bruă pơplih klă biă jing pơđĭ tui anŏ klă mơng bruă pơsir kơđi mơng Sang phăt kơđi; pơplih hơdră ngă bruă ƀơi anih phăt kơđi, pơphun phăt kơđi kiăo tui tơlơi pơplih phrâo, lăp djơ̆ hăng tơlơi pơplih hrŏm ƀơi rŏng lŏn tơnah. Mơng anun ngă hơkrŭ kơjăp tui tơlơi đăo gơnang mơng mơnuih ƀon sang hăng anih phăt kơđi mă glăi tơlơi dưi, anŏ djơ̆, pơhlôm kiăo tui tơlơi phiăn.

Khua mir sir ơi Nguyễn Xuân Phúc ngă bruă hăng Khua mua Ping gah Sang phăt kơđi

Khua mir sir kiăng sang bruă phăt kơđi kiăng ngă bruă hơdeč hmar hloh, pơsir kơđi tañ, tơpă sit, khut khăt hloh amăng bruă hưp ham ƀong kông ngăn, ngă soh tơlơi bơwih ƀong kơtang, hăng hơdôm kơđi tơlơi mơ̆ mơnuih ƀon sang pơđing hmư̆ hloh tui jơlan hơdră ngă bruă “ƀu hơmâo anih kŏm, ƀu pơgao kơ pô hlơi, ƀu kiăo tui tơlơi tek rơwek nao ƀu djơ̆ mơng pô hlơi, anom bruă pơpă ôh”.

Siu H’Mai: Pơblang