VOV4.Jarai - Lơ 7/6, Khua mir sir ơi Nguyễn Xuân Phúc, Khua anom git gai pơplih phrâo Tơlơi phiăn Kơnuk kơna hơmâo ngă bruă hăng Khua mua Ping gah Sang phăt kơđi gưl dlông kơ akŏ bruă “Pơplih phrâo anom bruă kơnuk kơna Sang phăt kơđi mă bruă hơdeč hmar, tŭ yua tui Tơlơi pơtrun jơnum lok 6 Ping gah dêh čar tal 12 kiăng djơ̆ tui rơnuk phrâo”. Tơdơi kơ ƀing khua mua pơgôp hiăp, pơđut mông ngă bruă, Khua mir sir ơi Nguyễn Xuân Phúc lăi nao tơlơi yôm hơmâo lăi nao amăng Tơlơi pơtrun 49 mơng Ding jum kơđi čar lĕ ngă pơgiong anom bruă tơlơi phiăn; amăng anun yôm hloh lĕ akŏ pơjing, ngă pơgiong anom bruă hăng bruă mă mơng Sang phăt kơđi kơnuk kơna.

Khua mir sir dêh čar ta pơtă, bruă akŏ pơjing sang phăt kơđi yôm biă mă, anai jing bruă ngă tui jơlan hơdră pơplih phrâo tơlơi phiăn phrâo 2021-2030, anăp nao thun 2045 tui tơlơi pơtrun mrô 49 mơng Ding jum kơđi čar. Biă ñu, hơdôm sang bruă phăt kơđi amăng kual khŏm pơhlôm hơmâo tơlơi wai lăng mơng Jơnum min pơ ala mơnuih ƀon sang, Ƀirô khua pơ ala mơnuih ƀon sang dêh čar, Jơnum min djŏp djuai ania mơnuih mơnam Việt Nam, biă ñu lĕ mơnuih ƀon sang hăng anom bruă phăt kơđi.

Siu H’Mai: Pơblang