VOV4.Jarai - Mơguah lơ 26/7, amăng jơnum blung a Khua pơ ala mơnuih ƀon sang dêh čar tal XV, hăng mrô hră dong yua 100% mơng khua mua, ơi Nguyễn Xuân Phúc, Ding kơna ding jum kơđi čar tal XIII, Khua pơ ala mơnuih ƀon sang dêh čar tal XV sit nik tŏ tui ruah ngă Khua mir sir dêh čar Việt Nam rơwang thun 2021-2026. Tơdơi kơ lăi pơthâo mrô hră dong yua, Khua mir sir ơi Nguyễn Xuân Phúc đĭ ngă lơphet pơphun đĭ apăn bruă.

Khua mir sir ơi Nguyễn Xuân Phúc ngă lơphet đĭ ngă khua

Đĭ pơhiăp amăng mông đĭ ngă khua, ơi Nguyễn Xuân Phúc pơdah pran pơpŭ bơni Khua pơ ala mơnuih ƀon sang dêh čar hơmâo đăo gơnang dong yua ruah ñu đĭ ngă khua mir sir dêh čar; pơpŭ bơni kơ Khua git gai Ping gah ơi Nguyễn Phú Trọng hăng khua mua hlâo anun hơmâo pơgôp prong prin brơi Ping gah, Kơnuk kơna hăng mơnuih ƀon sang. Mah amăng thun blan tơnap tap hăng gêh gal, Khua mir sir amra djă pioh hăng ngă tui pran kơtang tui gru gum pơgôp djop djuai ania, hrŏm hăng gru grua hiam klă mơng đưm hlâo adih mơng djuai ania ta, kiăng pơđĭ kyar kơtang, djop mơta hăng hơđong kjăp amăng dêh čar ta.

Siu Đoan: Pơblang