VOV4.Jarai - Mơmŏt tom brơi lơ 2/12 tui mông ƀơi dêh čar Nga, Khua mir sir ơi Nguyễn Xuân Phúc hăng bơnai ñu ba jơlan hlâo khua mua mơng dêh čar Việt Nam tơbiă mơng dêh čar Nga pơwŏt glăi pơ dêh čar ta, pơđut hiam klă hơdôm hrơi nao čuă sit nik dêh čar Nga tui tơlơi jak iâu mơng Khua mir sir Nga ơi Putin. Hăng giăm 30 wŏt nao jơnum pơƀut mơng Khua mir sir laih dong bruă mă mơng djop ding jum, gơnong bruă, tal nao čuă mơng Khua mir sir ơi Nguyễn Xuân Phúc ba glăi tŭ yua amăng djop mơta bruă ngă hrŏm kơplah wah dua boh dêh čar, pơtrut hăng ngă dơlăm tui tơlơi rô nao rai bơwih ƀong huă jing akŏ phun kơplah wah Việt Nam - Nga. Dua čô khua tŭ ư tŏ tui pok pơhai tŭ yua Tơlơi pơkôl sĭ mơdrô rơngai kơplah wah Việt Nam -  Khul pơlir hơbit bơwih ƀong huă kual Asia - Mi kô̆, ăt kah hăng ngă gêh gal amăng bruă sĭ mơdrô hăng tuh pơ alin dua bơnah, kiăng kơ pơtrut kơtang amăng djop mơta bruă yôm phun. Tal nao čuă dêh čar Nga mơng Khua mir sir ơi Nguyễn Xuân Phúc kiăng kơ pơtrut tơlơi rô nao rao ngă hrŏm dua bơnah mơ̆ pơdah rơđah hloh lĕ amăng tơlơi pơsit hrŏm kơ bruă ngă hrŏm djop mơta kơplah wah Việt Nam - Nga truh thun 2030.

Siu Đoan: Pơblang