VOV4.Jarai - Khua mir sir ơi Nguyễn Xuân Phúc hrŏm hăng bơnai ñu yă Trần Nguyệt Thu hăng Grup khua mua mơng Ping gah, Kơnuk kơna Việt Nam glăi truh laih pơ tơdron rơdêh por jar kmar Nội Bài, plơi prong Hà Nội, pơđut hiam laih tal nao čuă dêh čar Lao. Anai lĕ tal nao čuă dêh čar tač rơngiao blung a mơng khua mua Ping gah, Kơnuk kơna tơdơi kơ Jơnum Ping gah dêh čar tal 13; laih dong anai lĕ tal nao čuă dêh čar blung a mơng ơi Nguyễn Xuân Phúc lơ̆m ñu đĭ ngă Khua mir sir. Amăng 2 hrơi nao čuă, mơng lơ 9 truh lơ 10/8, Khua mir sir ơi Nguyễn Xuân Phúc hơmâo rơbêh 10 mơta bruă jơnum, bơbưp nao rai khua mua. Ding kơna amăng grup ăt hơmâo 15 mơta bruă bơbưp nao rai, bơkơtuai hăng khua mua ding jum, anom bruă mơng tơring čar Lao. Amăng tal nao čuă, hơmâo 14 hră pơkôl ngă hrŏm kơplah wah ding jum, anom bruă, anom bơwih ƀong hăng tơring čar dua bơnah. Hơdôm tơlơi anai brơi ƀuh, tal nao čuă hơmâo lu tơlơi klă hiam, ngă tơnhal phrâo bơbuă tui tơlơi rô nao rai ngă giăng mah yôm ƀom, ngă hrŏm amăng abih bang bruă kơplah wah Việt Nam hăng Lao.

Siu H’Mai: Pơblang