VOV4.Jarai - Khua mir sir ơi Nguyễn Xuân Phúc phrâo hơmâo mông pơhiăp telephôn hăng Khua mir sir Nga ơi Vladimir Putin. Dua čô khua hơmâo pơlăi nao rao hơdôm hơdră bruă kiăng kơtưn rô nao rai ngă hrŏm amăng djop mơta kơplah wah Việt Nam - Nga, ngă hrŏm pơgang hĭ klin Covid-19, kah hăng hơdôm bruă amăng kual hăng jar kmar mơ̆ dua bơnah đing nao.

Khua mir sir dêh čar ơi Nguyễn Xuân Phúc

Khua mir sir ơi Nguyễn Xuân Phúc pơsit Việt Nam lêng kơ lăng yôm tơlơi rô nao rai giang mah gru grua mơng đưm hlâo hăng ngă hrŏm djop mơta bruă hăng dêh čar Nga; čang rơmang kơtưn ngă hrŏm amăng lu bruă pơkŏn dong, yua kơ tơlơi dưi hrŏm amăng dua boh dêh čar. Kơ bruă ngă hrŏm kơplah wah Việt Nam  - Nga, Khua mir sir ơi Nguyễn Xuân Phúc hăng Khua mir sir ơi Vladimir Putin pơdah hok mơ-ak hăng hơdôm boh than dưi ngă amăng tơlơi rô nao rai dua bơnah amăng thun blan laih rơgao. Dua čô khua mir sir ăt pơčrông sai hơdôm bruă amăng jar kmar hăng amăng kual, pơsit amra tŏ tui gum hrŏm kjăp hăng tŭ yua hloh amăng hơdôm mông jơnum bơkơtuai amăng kual, amăng anun tŭ ư pơsir hĭ hơdôm bruă bơkơsua amăng kual ia rơsĭ Ngŏ tui hơdră rơnuk rơnua.

Siu Đoan: Pơblang