VOV4.Jarai-Ƀrô hơdor glăi tal 96 thun Hrơi hră pơhing phrâo Việt Nam lơ 21/6, Khua mir sir ơi Nguyễn Xuân Phúc mơ-it hiăp pơpŭ kơ abih bang ƀing čih tơlơi pơhing phrâo amăng dêh čar ta, laih dơ̆ng bơni kơ ƀing čih tơlơi pơhing ƀu hŭi kơ tơlơi tơnap tap, ngă hrom pơhlôm, pơgang klin Covid 19 thun blan rơgao.

Amăng hră mơ-it Khua mir sir čih: “Ƀrô djơ̆ hrơi hră pơhing hơkrŭ Việt Nam, kâo mơ-it hiăp abih pran jua bơni hăng lăng yôm biă mă, ƀing khua mua, mơnuih mă bruă, čih tơlơi pơhing phrâo, ƀing čih dăp jơlan hơdră, ngă phim amăng anom bruă čih tơlơi pơhing amăng dêh čar thun blan rơgao. Yua ƀing gih yơh djru hrom ngă hiam gru grua mơ̆ng anom bruă hră pơhing hơkrŭ Việt Nam hơmâo Khua mir sir Hồ Chí Minh pô akŏ pơjing hăng pơhrăm brơi”.

Khua mir sir ơi Nguyễn Xuân Phúc nao čuă ơi Đặng Minh Phương pô čih tơlơi pơhing rơgơi sui thun

Hlâo kơ anun, Khua mir sir ơi Nguyễn Xuân Phúc nao čuă, pơpŭ bơni hăng ƀơk gơnam kơ pô čih tơlơi pơhing phrâo kơhnâo kơhnăk ơi Đặng Minh Phương, thun anai 93 thun laih, tom mă bruă ƀơi 3 boh anom bruă hră pơhing Ping gah anun lĕ: Anom bruă hră pơhing anăn Pơklaih rơngai kual Dơnung Tong krah, hră pơhing Hla kơ pơklaih rơngai hăng hră pơhing Mơnuih ƀôn sang.

Ƀrô hơdor glăi 96 thun hrơi hră pơhing hơkrŭ Việt Nam, kơnang kơ pô čih tơlơi pơhing Đạng Minh Phương, Khua mir sir ơi Nguyễn Xuân Phúc mơ-it hiăp pơpŭ, bơni hơơč hăng tơña blan truh abih bang mơnuih čih tơlơi pơhing phrâo, ƀing ngă bruă amăng anom bruă tơlơi pơhing phrâo đơ đam dêh čar Việt Nam.

Nay Jek : Pơblang