VOV4.Jarai - Amăng tal nao čuă jơmư sit nik dêh čar Lao, yang hrơi dong lơ 10/8, ƀơi plơi prong jưh jom Vientian, Khua mir sir ơi Nguyễn Xuân Phúc hơmâo tŭ jum Kơ-iăng khua mir sir dêh čar Lao, yă Pany Yathotou hăng Kơ-iăng khua mir mir Bounthong Chitmany. Ƀơi mông bưp, Khua mir sir ơi Nguyễn Xuân Phúc lăi Ping gah, Kơnuk kơna hăng mơnuih ƀon sang Việt Nam lăng yôm hăng lăng ba hlâo kơ bruă hơkrŭ hăng pơtrut tui tơlơi rô nao rai, biă mă ñu tơlơi ngă hrŏm Việt Nam - Lao. Khua mir sir kiăng dua bơnah hơmâo ngă klă hloh hơdôm tơlơi pơkôl khua mua pơprong hơmâo kĭ; pơtrut ngă hrŏm ƀơi djŏp bruă, djru brơi bruă ngă hrŏm yôm, hrŏm hăng anun lĕ gum djru nao rai, biă ñu lĕ hơdôm boh tơring čar, plơi pla ha mơguai, kiăng pơgang klin hăng pơđĭ kyar bơwih ƀong huă- mơnuih mơnam; hyu pôr pơthâo, pơtô pơblang kơ gru grua ngă hrŏm giăng mah kơplah wah Việt Nam hăng Lao kơ abih bang mơnuih, biă ñu rơnuk hlăk ai kiăng thâo.

Siu H’Mai: Pơblang