VOV4.Jarai-Tlam lơ 29/6, ƀơi sang bruă khua mir sir, ơi Nguyễn Xuân Phúc Khua mir sir tŭ jum yă Victoria Kwakwa Kơ-iăng Khua sang bruă prăk rŏng lŏn tơnah WB wai lăng gah kual ngŏ ASIA hăng Thái Bình Dương hlăk rai čuă jơmư hăng mă bruă ƀơi Việt Nam. Hok mơak dưi bưp glăi yă Victoria Kwakwa, hăng gơyut jĕ giăm biă mă hăng mơnuih ƀôn sang Việt Nam, Khua mir sir lăi, yă Victoria Kwakwa hơmâo pơgôp pran jua prong biă mă amăng bruă pơtrut bơwih ƀong huă, bruă ngă hrom tŭ yua kơplah wah WB hăng Việt Nam.

Khua mir sir brơi thâo, Việt Nam ăt pok pơhai tŭ yua hơdră ngă hrom hăng WB; laih anun yă Victoria Kwakwa bơni hơơč kơ Việt Nam wai lăng tong ten klin Covid 19; lăi pơtong, amra djru Việt Nam bruă hơgĕt kiăng tơdah rơkâo blơi vaccine pioh pơhlôm, pơgang klin Covid 19, pơgang tơlơi suaih pral kơ mơnuih ƀôn sang.

Lăi nao kơ bruă pơđĭ kyar bơwih ƀong huă mơnuih mơnam mơ̆ng Việt Nam pơ anăp adih, yă Victoria Kwakwa lăi lĕ, Việt Nam kiăng gleng nao hloh bruă pơkra apui lơtrik mơ̆ng hơdăng, bơblih hơdră ngă hmua pla pơjing anăp nao mơtah mơda, rơgoh ayuh hyiăng.

Nay Jek: Pơblang