VOV4.Jarai - Hlâo kơ hrơi ngui No-el thun 2021, čơkă thun phrâo 2022, mơguah lơ 23/12, Khua mir sir ơi Nguyễn Xuân Phúc hơmâo nao čuă, ƀơk gơnam hăng pơpŭ hrơi ngui No-el kơ Sang jơnum prong Hà Nội hăng Jơnum min gum pơgôp đăo khŏp Việt Nam. Nao čuă Sang jơnum prong Hà Nội, Khua mir sir ơi Nguyễn Xuân Phúc pơpŭ kơ ama prong Giuse Vũ Văn Thiên, ama prong wai lăng Sang jơnum prong Hà Nội, Kơ-iăng khua čih pioh Khul đăo khŏp Việt Nam; laih dong ƀing ama, ƀing amai hăng ƀing pơ ala brơi hơdôm tơring đăo, ƀing kŏm drơi tui tơlơi đăo amăng Sang Jơnum prong Hà Nội čơkă bơyan No-el rơnuk rơnua, mơ-ak mơ-ai, bă blai bưng hiam mơng khua yang.

Khua mir sir ơi Nguyễn Xuân Phúc nao čuă, pơpŭ kơ Sang jơnum prong Hà Nội

Pơsit tong Ping gah, Kơnuk kơna lêng kơ pơhlôm brơi tơlơi dưi kơ mơnuih tui tơlơi đăo hluai tui tơlơi phiăn, Khua mir sir hok mơ-ak lơ̆m ƀuh, găn rơgao mơng đưm truh tŭ tă ră anai, mơnuih tui đăo khŏp lêng kơ gum hrŏm amăng bruă pơjing hăng wai pơgang lŏn ia; hơdip hiam tui tơlơi đăo pơtô. Hơdôm tơring đăo, ƀing kŏm drơi jăn tui tơlơi đăo hơmâo pơphun lu bruă kiăng kơ djru brơi ană mơnuih; sit biă ñu gum tơngan hrŏm amăng bruă pơgang klin Covid-19, ba glăi rup rap hiam klă, thâo khăp pap tơdruă.

Siu Đoan: Pơblang