VOV4.Jarai - Mơguah lơ 16/11, ƀơi ƀôn prong Hồ Chí Minh, Khua mir sir ơi Nguyễn Xuân Phúc hrŏm hăng Khua mua pơ ala mơnuih ƀon sang ƀôn prong Hồ Chí Minh, anom bruă mrô 10 hăng mrô 2 bưp mơnuih ƀon sang tơring glông Củ Chi, Hóc Môn, kuận 1,3 hăng kuận Bình Thạnh, mông bưp pơphun lăng nao rai mơng ataih hăng bưp ƀơi anăp, lăi pơthâo brơi mơnuih ƀon sang kơ boh tơhnal amăng jơlan lok 2, Khua pơ ala mơnuih ƀon sang dêh čar tal XV. Amăng mông bưp, Khua mir sir ơi Nguyễn Xuân Phúc brơi thâo, djop kuận, tơring glông kiăng pơčlah hĭ hơdôm bruă ngă ha amăng plĕ jing hơdôm hơnong pơkă phara, tong ten kiăng kơ pok pơhai. Sit biă ñu ƀôn prong Hồ Chí Minh kiăng kơ prap lui hŭi kơ hơmâo tơlơi truh sat lĕ klin Covid-19 hơđuh đĭ tal 5 dong. Khua mir sir ơi Nguyễn Xuân Phúc sa wŏt dong pơdah pran jua hăng hơdôm tơlơi tơnap tap mơ̆ Ping gah, gong gai hăng mơnuih ƀon sang ƀôn prong Hồ Chí Minh bưp laih rơgao hăng brơi thâo, Khul apăn bruă Ping gah dêh čar hơmâo pơsit amra pơphun Hrơi hơ-ŭ hơdor ƀing mơnuih apăn bruă, mơnuih ƀon sang, ling tơhan djai yua kơ klin Covid-19 ngă amăng lơ 19/11 pơ anăp anai. Kiăng kơ hơkrŭ glăi bơwih ƀong huă, Khua mir sir brơi thâo , ƀôn prong Hồ Chí Minh kiăng pok pơhai sa jơlan hơdră pơđĭ kyar amăng ƀôn prong amăng bruă tuh pơ alin, sĭ mơdrô amăng lŏn ia hăng tač rơngiao. Amăng anun kiăng đing nao hơdôm gơnam sĭ amăng bơyan Tết pơ anăp anai.

Siu Đoan: Pơblang