VOV4.Jarai-Ăt amăng bruă mă lơ̆m čuă dêh čar Mi ƀrô nao jơnum hrom khua mua abih bang djop dêh čar sang gum hơbit djop dêh čar tal 76 mơ̆ng lơ 20-25/9/2021, ƀơi ƀôn prong New York dêh čar Mi, Khua mir sir ơi Nguyễn Xuân Phúc hơmâo tŭ jum gơyut gơyâo dêh čar Mi, yua kơ yă Merle Ratner, khua djru bruă jak iâu djru ba mơnuih djơ̆ jrao hret Việt Nam ƀơi dêh čar Mi ngă khua khul.

Ƀơi mông bưp, Khua mir sir ơi Nguyễn Xuân Phúc bơni kơ tơlơi djru ba mơ̆ng gơyut gơyâo dêh čar, amăng bruă mă gum ba sit nik mơnuih ruă nuă djơ̆ jrao hret dioxin, ƀing rơka rơkač djơ̆ boh ƀôm mĭn dŏ glăi tơdơi kơ rơnuk blah ngă ƀơi Việt Nam. Khua mir sir lăi, tơdơi rơbêh 25 thun ngă mơak rô nao rai Việt Nam hăng Mi, jai hrơi hơmâo boh tŭ yua, hơđong kjăp tui; măng anun bơni kơ tơlơi djru ngă kjăp tơlơi đăo kơnang hăng tơlơi gir run lu biă mă mơ̆ng lu bơnah.

Khua mir sir pơdah pran jua čang rơmang gơyut gơyâo mơ̆ng dêh čar Mi ăt dong yua djru ba dua boh dêh čar, boh nik ñu amăng bruă mă pơsir tơlơi sat răm jrao hret dioxin ngă ƀơi Việt Nam.

Nay Jek : Pơblang