VOV4.Jarai-Tlam lơ 26/10, ƀơi anom bruă khua mir sir, ơi Nguyễn Xuân Phúc tŭ jum yă Tredene Cherie Dobson, Khua anih jưh pơ ala dêh čar New Zealand ƀơi Việt Nam. Khua mir sir ơi Nguyễn Xuân Phúc lăng yôm bruă mă mơ̆ng Khua anih jưh pơ ala New Zealand amăng bruă pơtrut ngă giăng mah pŭ ƀăn dua bơnah dêh čar.

Lơ̆m rơnuk klin kheng covid 19, tơnap tap, Khua mir sir rơkâo Khua anih jưh pơ ala dêh čar New Zealand ăt ngă hrom pơtrut bruă khua mua pơprong dua bơnah hăng khua mua djop gưl pok pơhai hơdră pơtom hiăp nao rai hơdeč hmar djơ̆ rơ-ua; wơ̆t hăng bưp anăp laih anun bưp lăng nao rai amăng tivi; kĭ pơkôl hơdră pok pơhai ngă hrom dua bơnah amăng thun anai. Khua mir sir čang rơmang dua bơnah dêh čar kơtưn hloh kiăng pơhrui glăi rơnoh prăk sĭ mơdrô truh 2 klai dolar Mi.

Dua boh dêh čar ăt ngă hrom kjăp laih anun dong yua nao rai tơdruă lu hloh amăng mông jơnum prong, bơkơtuai hăng lu bơnah ăt kah hăng lu tơlơi amăng kual hăng jar kmar.

Nay Jek: Pơblang