VOV4.Jarai - Ƀrô hrơi Việt Nam ngă giong bruă ngă Ding kơna amăng Khul pơgang rơnuk rơnua sang gum hơbit djŏp dêh čar rơwang thun 2020-2021, Khua mir sir dêh čar ơi Nguyễn Xuân Phúc phrâo hơmâo tơlơi pôr pơthâo yôm, amăng anun, lăi nao Việt Nam khin hơtai ngă bruă, dưi glăm ba lu bruă prong ƀơi jar kmar yua tơlơi rơngai hăng pơđĭ kyar hơđong. Pơtrut tui tơlơi hơmâo tơlơi kơdrưh kơ-ang phrâo mơng lŏn ia hăng tơlơi gir run, Việt Nam gum ngă bruă, ba tơbiă lu tơlơi pơčeh phrâo, pơgôp prong biă amăng bruă mă mơng Khul pơgang rơnuk rơnua, hăng tơlơi pơmin mơng anăp truh pơ tlôn lĕ “Ngă hrŏm yua tơlơi rơngai hơđong kơjăp” amăng bruă hyu ĕp hơdră pơsir pơgăn, pơsir hĭ tơlơi kơsung blah, pơtruh nao rai ngă hrŏm Khul pơgang rơnuk rơnua hăng ASEAN, pơgăn glăi tơlơi lông hăng tơlơi rơngai, rơnuk rơnua jar kmar, kiăo tui Hră hiến chương Sang gum hơbit djŏp dêh čar hăng tơlơi phiăn jar kmar. Mơng anun, ăt pơdah rup sa boh lŏn ia Việt Nam ngă bruă hơdeč hmar, pơplih phrâo, hăng tơlơi pôr pơthâo kơtang kơ bruă lăng nao pơ anăp, čang rơmang pơđĭ kyar lŏn ia pơdrong asah kơdrưh kơ-ang truh thun 2045 hơmâo ba tơbiă ƀơi mông Jơnum Ping gah dêh čar tal 13. Gum hrŏm hăng jar kmar, jing sa Việt Nam phrâo, khin hơtai ngă bruă, dưi glăm ba lu bruă yôm ƀơi jar kmar yua tơlơi rơngai hăng pơđĭ kyar hơđong kơjăp.

Siu H’Mai: Pơblang