VOV4.Jarai-Ƀrô hơdor  kơ Hrơi tơlơi thâo kơhnâo bruă mă Việt Nam lơ 4/10, Khua mir sir ơi Nguyễn Xuân Phúc phrâo hơmâo hră mơ-it iâu pơthưr ngă hrom pơđĭ tui tơlơi thâo kơhnâo kơhnăk mă bruă : “Yua kơ sa Việt Nam dưi hĭ hăng klin kheng laih anun pơđĭ kyar hơđong kjăp”. Amăng hră hơmâo čih: Ping gah hăng Kơnuk kơna gleng nao biă mă, hơdeč hmar bruă čih pơkra hră pơtrun jơlan hơdră pioh pơtrut tơlơi thâo kơhnâo kơhnăk mă bruă. Laih anun ƀuh rơđah, lu mơnuih mă bruă hơmâo tơlơi thâo, boh nik ñu ƀing kơhnâo kơhnăk, hơmâo lu tơlơi pơgôp prong kơ bruă pơđĭ kyar bơhi ƀong huă-mơnuih mơnam.

Ƀrô djơ̆ hrơi Tơlơi kơhnâo kơhnăk mă bruă Việt Nam lơ 4/10 thun anai, kâo iâu pơthưr abih bang mơnuih mă bruă amăng dêh čar, ƀu pơdơi ôh hrăm na nao amăng bruă mă, pơhrăm tơkai tơngan kơhnăk mă bruă, na nao thâo pơčeh phrâo kiăng pơblih pơđĭ tui boh tơhnal tŭ yua amăng bruă mă. Mông anai ƀing ta dŏ gir run hloh dơ̆ng gum tơngan hrom găn rơgao hĭ klin Covid 19.

Kâo hơmâo sa tơlơi đăo kơnang kjăp lĕ mơnuih mă bruă Việt Nam khom pơđĭ tui abih pran jua hiam hăng tơlơi kơhnâo kơhnăk mơ̆ng ta pô hrưn đĭ hrăm, mă bruă hăng pơkra ming, djru kơ bruă ba lŏn ia ta tañ dưi hĭ hăng klin kheng laih anun pơtrut pơđĭ kyar hơđong kjăp, pơdrong asah mơ̆ng rơnuk phrâo.

Nay Jek: Pơblang