VOV4.Jarai - Yŭ tơlơi git gai mơng Khua git gai pơ ala mơnuih ƀon sang dêh čar ơi Vương Đình Huệ, mơguah lơ 10/11, bruă tơña hăng lăi glăi tơlơi tơña blung a hăng hơdôm mơta bruă gah ia jrao hơmâo pơphun laih. Pơhiăp pok pơphun mông jơnum tơña, Khua git gai pơ ala mơnuih ƀon sang dêh čar ơi Vương Đình Huệ lăi: bruă tơña ƀu kơnong jing sa bruă wai lăng, pơđĭ tui tơlơi gơgrong bruă lăi pơthâo glăi, biă ñu lĕ mơng ƀing khua đôč ôh, anai ăt jing hrơi kiăng pơblăi nao rai djru bruă wai lăng, ăt kah hăng ngă bruă čih pơkra tơlơi phiăn hăng pơsit hơdôm bruă yôm mơng lŏn ia ta. Tơña kơ Khua ding jum ia jrao Nguyễn Thanh Long, lu khua tơña kơ bruă pơhlôm hơmâo anih brơi hăng wai lăng prăk pơčrang kman Covid-19, ia jrao, măi mok gơnam yua gah ia jrao. Bruă pơđĭ nua pơčrang kman Covid-19 ăt hơmâo lu mơnuih lăi nao, jing ngă hang amăng tơngia hloh amăng Sang jơnum. Khua ding jum ia jrao ơi Nguyễn Thanh Long lăi: nua gơnam sinh phẩm kiăo tui anih pơkra, hrơi mông ƀing ta blơi mơn. Laih dong thâo hluh tơlơi gơgrong bruă mơng anom bruă ia jrao hăng ƀuăn amra krăp lăng klă bruă arăng mă prăk pơčrang kman amăng hrơi blan pơ anăp. Lu khua lăi kiăng ngă rơđah bruă wai leng, pel ĕp mơng Ding jum ia jrao pioh hơmâo tơlơi soh glăi amăng hrơi blan rơgao. Khua git gai pơ ala mơnuih ƀon sang dêh čar Vương Đình Huệ kiăng: Thun 2022 pơƀut pel ĕp, wai lăng, jŭ yap glăi anih bruă iâu pơthưr, wai lăng bruă mă yua djŏp mơta pioh pơgang klin, pơgăn hĭ tơlơi soh sat, ƀong prăk kăk, ngă bruă kiăng klă kơ pô đôč.

Siu H’Mai: Pơblang