VOV4.Jarai - Ƀơi anăp tơlơi truh klin kheng Covid-19 jai hrơi kơtang, Lâm Đồng kiăng ƀing khua, mơnuih mă bruă ƀơi hơdôm gơnong bruă, anom bruă amăng tơring čar khŏm pơčrang kman 3 hrơi ha wơ̆t. Lơ 23/11, tơring čar Lâm Đồng čih pioh hơmâo dong 171 čô mơnuih ƀă klin Covid-19, pơđĭ tui mrô mơnuih ƀă klin amăng tơring čar lĕ 2.154 čô. Mrô mơnuih ƀă klin lu tui dong mơng hrơi tơring čar phru ƀiă bruă pơgăn, kŏm tơbiă hyu. Tui hăng tơlơi pơtŏng mơng Jơnum min mơnuih ƀon sang tơring čar Lâm Đồng, klin Covid-19 kơtang tui lĕ yua mơnuih ƀon sang mơng hơdôm boh tơring čar, ƀon prong nao pơ Lâm Đồng, jing ngă klin ƀă hyu, amuñ hơđuh jing klin prong.

Mơnuih ƀon sang nao ngă hră pioh pơčrang kman ƀơi CDC Lâm Đồng

Kiăng dưi ngă dua mơta bruă hrŏm hrŏm, pơgang klin tŭ yua, pơhlôm tơlơi suaih pral, tơlơi hơdip kơ mơnuih ƀon sang hăng pơđĭ kyar bơwih ƀong huă mơnuih mơnam, Jơnum min mơnuih ƀon sang tơring čar Lâm Đồng git gai hơdôm anom bruă čar amăng tơring čar pơčrang kman brơi ƀing khua, mơnuih mă bruă 3 hrơi ha wơ̆t. Laih dong kiăng hơdôm anom bruă, mơnuih mơnam nao mă bruă pơ tơring čar anai khŏm tlâ̆o djŏp arăt vaccine hăng pơčrang huăi ƀuh kman tui hrơi pơkă.

Siu H’Mai: Pơblang