VOV4.Jarai-Hơdor glăi tal 76 thun hrơi akŏ pơdong kơnuk kơna lŏn ia Cộng hoà xã hội chủ nghiã Việt Nam, lơ 2/9/1945-lơ 2/9/2021, mơguah lơ 1/9, Grup khua mua ping gah dêh čar, khua mir sir, khua git gai pơ ala mơnuih ƀôn sang dêh čar, khua kơnuk kơna, khua jơnum min djop djuai ania mơnuih mơnam Việt Nam nao dưm guang bơnga, čuă pơsat jep khua mir sir Hồ Chí Minh.

Hăng pran jua hơdor bơni prong prin, grup khua mua dêh čar ta pơdah rai pran jua h’ŭ pơpŭ dơlăm pran jua mơ̆ng Khua mir sir Hồ Chí Minh hăng bruă hơkrŭ kơ Ping gah laih anun djuai ania. Wa hơmâo pơyơr abih pran jua tơlơi hơdip pô kơ mơnuih ƀôn sang, kơ lŏn ia, ba jơlan kơ ping gah, mơnuih ƀôn sang ta dưi ngă bruă hing ang, tŭ yua prong kơ djuai ania, lŏn mơnai glai klô dêh čar ta.

Guang bơnga mơ̆ng khua mua ping gah kơnuk kơna ta hơmâo čih glông boh hră “Hơdor bơni na nao kơ Khua mir sir Hồ Chí Minh prong prin”. Laih kơ anun, khua mua ping gah dêh čar, khua mir sir, khua git gai pơ ala mơnuih ƀôn sang dêh čar, khua kơnuk kơna, khua jơnum min djop djuai ania mơnuih mơmam Việt Nam nao dưm guang bơnga laih anun tŭi ñang ƀâo bơngưi h’ŭ bơngăt atâo ƀing tơhan djai pơsăn drơi jăn kơ lŏn ia, či jơlan Bắc Sơn, Hà Nội.

Nay Jek: Pơblang