VOV4.Jarai - Tlam lơ 4/1, pơčrông sai ƀơi grup kơ črăn tơlơi pơsit hơdră prăk kak kiăng kơ djru brơi Jơlan hơdră hơkrŭ glăi hăng pơđĭ kyar bơwih ƀong huă-mơnuih mơnam, ƀing khua mua tŭ ư kiăng hơmâo hơdră prăk kak, hơkrŭ glăi, pơđĭ kyar bơwih ƀing huă sĭ mơdrô tañ hloh; pơhlôm tơlơi hơdip kơ mơnuih ƀon sang. Samơ̆, sa, dua čô khua mua ăt bơngŏt kơ hơdôm hơdră prăk kak lơ̆m mă yua amra ƀu ba glăi tŭ yua. Laih dong, rơkâo hơdră prăk kak đing nao hơdôm gơnong bruă kiăng djru pơtrut bơwih ƀong. Ƀing khua mua ăt brơi thâo aka ƀu hơmâo tơlơi ngă bơkơnar kơplah wah hơdră mă yua ngăn drăp hăng hơdră prăk kak amăng črăn tơlơi pơsit djru Jơlan hơkrŭ glăi hăng pơđĭ kyar bơwih ƀong huă-mơnuih mơnam. Pơčrông sai ƀơi grup, Khua mir sir ơi Nguyễn Xuân Phúc rơkâo pơhrua hơdôm hơdră kiăng kơ tŭ yua dong lơ̆m mă yua  ngă drăp Kơnuk kơnan hăng kơtưn amăng tong ten amăng mă jia. Ơi Nguyễn Trường Giang, khua pơ ala mơnuih ƀon sang tơring čar Dak Nông tŭ ư hăng tơlơi pơtrun lui ƀudah hrŏ trun mă jia, amăng anun hrŏ trun jia 2% brơi hơdôm gơnam glăk mă jia 10%. Samơ̆, khua mua rơkâo kiăng kơ pel ĕp hơdôm anom bruă amra hrŏ jia, đing nao hơdôm gơnong bruă kiăng pơtrut pơsur bơwih ƀong sĭ mơdrô. Ƀing khua mua ăt rơkâo lơ̆m tơlơi pơsit dưi mă yua, Kơnuk kơna hăng djop ding jum, gơnong bruă ƀuăn, ngă rơđah hơdôm tơlơi gơgrong, lăi pơthâo tong ten, hơmâo mơnuih glăm ba, biă mă ñu tơlơi glăm ba mơng ƀing khua mua amăng git gai hăng kiăo tui lăng lơ̆m pok pơhai ngă tui hơdră djru, pơhlôm djơ̆ tơlơi pơkă, huăi huăč prăk kak, pơhlôm tŭ yua hăng djơ̆ hloh.

Khua mua pơ ala mơnuih ƀon sang pơčrông sai lăng nao rai hăng Daklak

Tơdơi kơ hmư̆ Kơnuk kơna lăi pơdah Hră lăi pơthâo mơng 3 hră čih pơkra tơlơi pơtrun pơsit hăng sa rơwang bruă tơlơi phiăn ƀơi tal jơnum ƀu hmâo pơkă hlâo mơng Khua pơ ala mơnuih ƀôn sang dêh čar ta tal 15, Grŭp Khua pơ ala mơnuih ƀôn sang tơring čar Daklak phun ñu tŭ ư hrom hăng pơsit yôm hơdôm tơlơi čih pơkra hmao ba tơbiă bôh yôm phăn, ječ kơ hơkrŭ glăi hăng pơđĭ kyar bơwih ƀong – mơnuih mơnam. Ƀing Khua pơ ala ăt gum pơhiăp mơn kơ tơlơi čih pơkra Tơlơi pơtrun pơsit kơ hơdră bruă prăk kak kiăng djru Jơlan hơdră hơkrŭ glăi hăng pơđĭ kyar bơwih ƀong – mơnuih mơnam. Khă hnun hai, khua pơ ala Lê Thị Thanh Xuân pơdah tơlơi bơngot kơ hơdôm mrô jŭ yap ba tơbiă. Gah hrơi blan ngă tui hơdôm hơdră bruă, khua pơ ala Nguyễn Thị Thu Nguyệt, lăi lĕ, lom ba tơbiă hơdôm hơdră bruă anai mơ̆ hrơi blan ngă tui amăng 2 thun lĕ ƀiă đơi hă, jơlan gah khom lăi pơthâo rơđah:

“Bruă ngă tui hiưm hơpă kiăng pơhlôm bôh tŭ yua djơ̆ tui tơhnal ba tơbiă lĕ kơnuk kơna khom kơsem min đing nao pok pơhai ha amăng plĕ hăng hmâo glông jơlan hiưm hơpă? Dua dong lĕ, khom ruah akô̆ tlôn hơƀơi kiăng đing nao hlâo pok pơhai ngă tui hơdôm hơdră bruă anai anun kah mơng pơhlôm tơlơi kiăng. Tui anun rơkâo anô̆ blung a hăng hrom hrom hloh Kơnuk kơna kiăng đing nao hăng ba tơbiă hơdôm jơlan gah, hơdôm tơlơi tơnap, hơdôm tơlơi gun hăng khom ngă hiưm hơpă pioh dưi pok pơhai ngă tui amăng 2 thun”./.

Siu Đoan-Siu Prăk: Pơblang