VOV4.Jarai-Hrơi anai, lơ 25/10, Khua mua pơ ala mơnuih ƀôn sang jơnum mơ̆ng ataih lăng nao rai amăng tivi kơ kơčăo bruă čih pơkra glăi Tơlơi phiăn, pơhrua dơ̆ng hơdôm mơta tơlơi Bộ luật Tố tụng hình sự, tơlơi phiăn tơgŭ kơđi tơlơi soh; kơčăo bruă čih pơkra pơhrua dơ̆ng hơdôm mơta tơlơi mơ̆ng Tơlơi phiăn Jŭ yap laih anun bơkơtuai amăng grup kơ kơčăo bruă Tơlơi phiăn sĭ mơdrô hră pơhlôm nua čih pơkra glăi.

Amăng lơ 24/10, khua mua pơ ala mơnuih ƀôn sang dêh čar bơkơtuai mơ̆ng ataih lăng nao rai amăng tivi kơ hră lăi pơthâo hlâo mơ̆ng Khua sang phat kơđi dêh čar, Khua sang bruă ĕp kơđi mơnuih ƀôn sang dêh čar; bruă pơhlôm hlâo, pơgăn tơlơi soh sat hăng ngă soh glăi tơlơi phiăn kơnuk kơna; bruă ngă tui kơđi laih phat; bruă pơhlôm, pơgăn tơlơi soh ƀong kông ngăn thun 2021; Kơčăo bruă Hră pơtrun kơ bruă pơphun phat kơđi mơ̆ng ataih lăng nao rai amăng tivi.

Lu boh yôm phun khua mua pơ ala đing nao bơkơtuai lĕ bruă pơphun phat kơđi mơ̆ng ataih lăng nao rai lăng tivi hăng bruă pơhlôm, pơgăn tơlơi soh ƀong kông ngăn. Lu khua mua pơ ala lăi lĕ, tơlơi soh sat ƀong kông ngăn ngă tơnap kơ mơnuih ƀôn sang, kơ anom bruă sĭ mơdrô amăng bruă ngă hră pơar, bơwih bơwang kơ bruă čar, biă mă ñu amăng bruă mơ̆ng kông an, ling tơhan, bruă ia jrao, hơmâo ƀu ƀiă ôh mơnuih ƀong kông ngăn, tơl tơgŭ kơđi soh prong hình sự.

Nay Jek: Pơblang