VOV4.Jarai-Ăt amăng hơdră jơnum ƀu pơkă hlâo, mơguah lơ 6/1, ƀơi 10 grup mă bruă amăng Sang jơnum prong khua mua pơ ala mơnuih ƀôn sang dêh čar hăng 62 grup pơ ala ƀơi tơring čar, ƀôn prong, ƀing pơ ala mơnuih ƀôn sang dêh čar hơmâo pơčrông sai tơlơi phiăn čih pơkra glăi, pơhrua tui hơdôm tơlơi amăng Tơlơi phiăn Tuh pơ alin bruă čar, tuh pơ alin tui hluai bruă kơnuk kơna hăng bơnah ngă hrom, tơlơi phiăn tuh pơ alin, tơlơi phiăn juă nua, tơlơi phiăn apui lơtrik, tơlơi phiăn anom bruă sĭ mơdrô, tơlơi phiăn mă jia yôm phara, tơlơi phiăn ngă tui tơlơi pơtrun kơđi laih phat gah bruă mơnuih ƀôn sang.

Bruă čih pơkra pơhrua dơ̆ng hơdôm tơlơi amăng 8 tơlơi phiăn dêh čar kiăng ngă djop hăng jơlan hơdră, tơlơi kiăng mơ̆ng Ping gah laih anun hmao pơsir hĭ anŏ dŏ kơƀah, aka ƀu găl lơ̆m dŏ dong ƀong huă rĭm hrơi. Či tlam lĕ, ƀing khua mua pơ ala bơkơtuai amăng grup kơ jơlan hơdră: Kơčăo bruă tuh pơ alin čuk pơkra jơlan rơdêh đuăi mar mơng kual Kơdư nao pơ Dơnung phrâo gah ngŏ mơ̆ng thun 2021-2025 laih anun kơčăo bruă čih Hră pơtrun ngă tui tơlơi phiăn, bruă pơkă phara pioh pơđĭ kyar ƀôn prong Cần Thơ.

Nay Jek: Pơblang