VOV4.Jarai - Mơguah lơ 20/10, ƀơi Sang jơnum prong Diên Hồng, tui tơlơi git gai mơng Khua git gai pơ ala mơnuih ƀon sang dêh čar ơi Vương Đình Huệ, Khua pơ ala mơnuih ƀon sang dêh čar tal 15 pơphun jơnum lok 2 lăng nao rai ơng ataih ƀơi sang jơnum Diên Hồng, Ƀirô Khua pơ ala mơnuih ƀon sang dêh čar hăng 62 anih lăng nao rai pơ hơdôm tơring čar, ƀôn prong. Tui jơlan hơdră hơmâo pơsit laih, amăng jơnum anai, Khua pơ ala mơnuih ƀon sang dêh čar amra sem lăng, pơsit 2 črăn tơlơi phiăn, 5 tơlơi pơsit hăng pơgôp hiăp amăng 5 črăn tơlơi phiăn.

Khua pơ ala mơnuih ƀon sang dêh čar amra sem lăng hơdôm hră lăi pơthâo mơng Kơnuk kơna kiăng kơ lăng glăi lơ̆m ngă tui akŏ bruă pơđĭ kyar bơwih ƀong huă- mơnuih mơnam hăng jŭ yap ngăn drăp kơnuk kơna amăng thun 2021; sem lăng hăng pơsit akŏ bruă pơđĭ kyar bơwih ƀong huă-mơnuih mơnam thun 2022 hăng akŏ bruă prăk kak - ngăn drăp kơnuk kơna 3 thun 2022-2024; bruă lui hĭ jang jai pơplih hơdră apah prăk blan tui tơlơi pơsit mơng Gơnong glông hăng Ƀirô Khua pơ ala mơnuih ƀon sang dêh čar ; bruă pơgang klin Covid-19 hăng bruă ngă tui tơlơi pơsit mrô 30/2021/QH15 jơnum lok blung a; sem lăng, pơsit akŏ bruă pơplih bơwih ƀong huă rơwang thun 2021-2025, akŏ bruă mă yua lŏn mơnai rơwang thun 2021-2030, anăp nao thun 2050 hăng akŏ bruă mă yua lŏn mơnai 5 thun 2021-2025 hăng sa, dua boh tơhnal yôm phun pơkŏn dong.

Siu Đoan: Pơblang