VOV4.Jarai - Lơ 16/6, mơng Sang bruă Khua pơ ala mơnuih ƀon sang dêh čar, Grup khua pơ ala mơnuih ƀon sang Việt Nam yua ơi Vũ Hải Hà, Ding kơna Ping gah, Ding kơna Jơnum min khua apăn bruă pơ ala mơnuih ƀon sang, Khua Jơnum min pơtom hiăp hăng dêh čar tač rơngiao ngă Khua ba jơlan nao jơnum Grup pơphô bruă Khul pơlir hơbit Hơdôm boh dêh čar kual Đông Nam Á tal 12 (AIPA Caucus 12) lăng nao rai amăng tivi. Grup khua mơng Việt Nam hrŏm hăng hơdôm boh dêh čar ding kơna hơmâo lăi pơthâo nao rai bruă mă hăng ding kơna AIPA, biă ñu amăng hrơi mông ƀơi kual hăng jar kmar glăk bưp lu tơnap tap amăng bruă pơgang klin Covid-19 hăng pơđĭ kyar glăi tơlơi bơwih ƀong huă; akŏ pơjing tơlơi rô nao rai mơ-ak hăng ƀing khua mơng kual ASEAN, pơdah tơlơi thâo pơmin, ngă hrŏm kiăng rŭ glăi tơlơi bơwih ƀong, pơđĭ kyar mơtah, pơđĭ kyar hơđong kơjăp tơdơi abih klin Covid-19, yua tơlơi hơđong kơjăp hăng pơdrong asah mơng mơnuih ƀon sang ASEAN. Pơđut mông jơnum, ƀing khua tŭ ư Hră lăi pơthâo bruă mă Jơnum grup pơphô bruă Khul pơlir hơbit hơdôm boh dêh čar kual Đông Nam Á tal 12, laih anun anih pơphun hăng hrơi pơphun Jơnum Grup khua pơphô bruă Khul pơlir hơbit pơ ala hơdôm boh dêh čar kual Đông Nam A tal 13 amra pơphun ƀơi Thái Lan.

Siu H’Mai: Pơblang