VOV4.Jarai - Tlam 16/8, ƀơi Sang bruă khua pơ ala mơnuih ƀon sang, Khua git gai pơ ala mơnuih ƀon sang dêh čar ơi Vương Đình Huệ git gai mông jơnum prăp lui mơng khua mua Việt Nam nao pơhmư̆ mông Jơnum khua mua AIPA-42 hơmâo pơphun lăng nao rai amăng tivi amăng lơ 23 truh 25/8 yua dêh čar Brunei, Khua AIPA-42 git gai. Ƀơi mông jơnum, ơi Vương Đình Huệ kiăng apăn bruă hloh, pơđĭ tui anŏ klă bruă pơtom hiăp mơng Ƀirô khua pơ ala mơnuih ƀon sang lĕ sa amăng hơdôm tơlơi yôm phun pơplih phrâo bruă mă mơng Ƀirô khua pơ ala mơnuih ƀon sang dêh čar. Khua mua pơtom hiăp amăng Ƀirô pơ ala mơnuih ƀon sang khŏm pơđĭ tui tơlơi rơgơi, tơlơi hing ang mơng lŏn ia ta amăng kual hăng ƀơi jar kmar. Tui tơlơi pơmin anun, Khua git gai pơ ala mơnuih ƀon sang dêh čar kiăng hơdôm anom bruă bơdjơ̆ nao, biă ñu lĕ Jơnum min pơtom hiăp hăng tač rơngiao hăng Anom bruă pơ ala mơnuih ƀon sang dêh čar khŏm prăp lui tañ hloh, pơhlôm brơi hơdôm tơlơi ba bơkơtuai mơng Grup khua mua pơ ala mơnuih ƀon sang Việt Nam ƀơi mông Jơnum AIPA-42. Biă ñu, amăng hrơi mông klin Covid-19 glăk kơtang tui anai, Khua git gai pơ ala mơnuih ƀon sang dêh čar lăi, Khua mua pơ ala mơnuih ƀon sang Việt Nam khŏm lăi pơthâo rơđah tơlơi pơmin ngă hrŏm kơplah wah anom bruă pơ ala mơnuih ƀon sang amăng AIPA hăng hơdôm boh dêh čar ASEAN amăng bruă pơgang klin Covid-19.

Siu H’Mai: Pơblang