VOV4.Jarai - Tlam lơ 15/6, ƀrô tal hơdor glăi 96 thun hrơi pioh hơdor hră pơhing ngă hơkrŭ Việt Nam (21/6), amăng ƀirô Khua pơ ala mơnuih ƀon sang dêh čar , anom bruă Khua pơ ala mơnuih ƀon sang dêh čar bưp ƀô̆ mơta hăng mă bruă hăng ƀing khua hơdôm anom bruă mă tơlơi pơhing. Nao jơnum hăng đĭ pơhiăp amăng mông bưp, Khua pơ ala mơnuih ƀon sang dêh čar ơi Vương Đình Huệ lăi pơtong tơlơi gơgrong mơng anom mă tơlơi pơhing amăng bruă mă mơng Khua pơ ala mơnuih ƀon sang dêh čar lĕ yôm phăn biă mă. Anai lĕ anom bruă hơmâo mơnuih ƀon sang đăo gơnang, anom bruă ba boh pơhiăp mơng mơnuih ƀon sang, abih bang tơlơi pơhing kơ bruă mă mơng Khua pơ ala mơnuih ƀon sang dêh čar amra ƀu truh tơl mơnuih ƀon sang amăng dêh čar hăng tač rơngiao tơdah ƀu hơmâo anom bruă mă tơlơi pơhing phrâo. Mơng anom mă tơlơi pơhing, mơnuih ƀon sang amra kiăo tui lăng bruă mă mơng Khua pơ ala mơnuih ƀon sang dêh čar, hơdôm tơlơi pơsit mơng Khua pơ ala mơnuih ƀon sang dêh čar kơ tơlơi phiă, krăo lăng hăng hơdôm tơlơi pơtrun yôm phăn kơ lŏn ia ăt amra ƀu dưi mă yua sit nik tơdah tơlơi hơdip sit nik ƀu mut hrŏm hăng bruă mă mơng Khua pơ ala mơnuih ƀon sang dêh čar. Tŭ ư hăng hơdôm tơlơi pơgôp mơng ƀing khua mua hơdôm anom bruă mă tơlơi pơhing, pơ anăp anai, Khua pơ ala mơnuih ƀon sang dêh čar ta ơi Vương Đình Huệ lăi pơtong, bruă hơget ba glăi tơlơi dưi kơ mơnuih ƀon sang, djơ̆ hăng tơlơi pơtrun mơng Ping gah, tơlơi phiăn Kơnuk kơna, djơ̆ hăng tơlơi kiăng mơng mơnuih ƀon sang anom mă tơlơi pơhing phrâo kiăng đing nao pôr pơhing.

Siu Đoan: Pơblang