VOV4.Jarai - Tŏ tui hơdôm hrơi nao čuă hăng mă bruă ƀơi hơdôm tơring čar kual Dap kơdư, lơ 1/7, Khua pơ ala mơnuih ƀon sang dêh čar ta ơi Vương Đình Huệ mă bruă hăng khua mua tơring čar Dak Nông. Đĭ pơhiăp amăng mông mă bruă, Khua pơ ala mơnuih ƀon sang dêh čar ta ơi Vương Đình Huệ lăng yôm bruă Dak Nông pơphun klă hrơi plĕ hră ruah khua mua pơ ala mơnuih ƀon sang hăng Khua jơnum min pơ ala mơnuih ƀon sang djop gưl; tơdơi kơ Jơnum Ping gah, tơring čar hơmâo ruah mơnuih apăn bruă mơng tơring čar, tơring glông truh pơ să; pok pơhai jơlan hơdră bruă mă tui tơlơi pơsit mơng Jơnum Ping gah đơ đam dêh čar tal XIII hăng tơlơi pơsit mơng Jơnum Ping gah tơring čar tal XII brơi lăp djơ̆.

Khua pơ ala mơnuih ƀon sang dêh čar mă bruă ƀơi Dak Nông

6 blan akŏ thun anai, tơlơi bơwih ƀong huă, mơnuih mơnam amăng tơring čar ăt hơđong, pơđĭ kyar 6,03, anai lĕ hơdôm tơlơi gir run prong prin, pơhmu hăng đơ đam dêh čar; pơhrui ngăn drăp 58%. Khua pơ ala mơnuih ƀon sang dêh čar ta ơi Vương Đình Huệ lăi pơtong, amăng hrơi blan pơgang klin jlă tui ră anai, tơring čar Dak Nông amra hrưn đĭ kơtang kiăng pơlir amăng kual, pơlir bruă sĭ hăng blơi gơnam tam, pơhưč tuh pơ alin; pơjing akŏ bruă ngă hmua, pơđĭ kyar hơdôm gơnam yôm hloh amăng tơring čar. Sa amăng hơdôm bruă ngă aka ƀu klă ƀơi tơring čar Dak Nông amăng thun blan laih rơgao, anun lĕ bruă mơnuih đuăi hyu dŏ hơdơ̆ hor, Khua pơ ala mơnuih ƀon sang dêh čar ta ơi Vương Đình Huệ lăi pơtong, tơring čar kiăng pơjing boh tơhnal phun, pơsir hĭ bruă mơng dua bơnah.

Ăt amăng lơ 1/7, Khua pơ ala mơnuih ƀon sang dêh čar ta ơi Vương Đình Huệ hăng grup hyu mă bruă hơmâo nao čuă hăng ƀơk gơnam brơi mơnuih apăn bruă, kông ang tơring čar Dak Nông. Bruă mă anai lĕ pơđut hĭ hơdôm hrơi hyu mă bruă mơng Khua pơ ala mơnuih ƀon sang dêh čar ta ơi Vương Đình Huệ hăng grup hyu mă bruă ƀơi hơdôm tơring čar kual Dap kơdư.

Siu Đoan: Pơblang