VOV4.Jarai - Mơguah lơ 30/6, ƀơi plơi prong Buôn Ma Thuột, Daklak pơphun jơnum blung a, Jơnum min pơ ala mơnuih ƀon sang tal X, rơwang thun 2021-2026. Khua pơ ala mơnuih ƀon sang dêh čar  ơi Vương Đìng Huệ nao jơnum hrŏm. Amăng mông jơnum anai, Jơnum min plĕ hră tơring čar Daklak tŭ yap 75 čô Khua jơnum min pơ ala mơnuih ƀon sang tơring čar tal X, rơwang thun 2021-2026; laih dong ruah ơi Y Vinh Tơr, Kơ-iăng khua apăn bruă Jơnum min pơ ala mơnuih ƀon sang tơring čar Daklak tal 9 ngă khua Jơnum min pơ ala mơnuih ƀon sang tơring čar hăng mrô hră plĕ 98,66%. Ruah ơi Phạm Ngọc Nghị, Khua jơnum min mơnuih ƀon sang tơring čar rơwang thun 2016-2021 ngă glăi Khua Jơnum min mơnuih ƀon sang tơring čar Daklak rơwang thun 2021-2026 hăng mrô hră plĕ 100%.

Khua pơ ala mơnuih ƀon sang dêh čar git gai jơnum Jơnum min pơ ala mơnuih ƀon sang tơring čar tơring čar Daklak

Đĭ pơhiăp amăng mông jơnum, Khua pơ ala mơnuih ƀon sang dêh čar ta ơi Vương Đình Huệ lăi pơtong, khua jơnum min pơ ala mơnuih ƀon sang kiăng ba kru, thâo pơmĭn khin ngă, amra glăm ba bruă mă yua ƀing gơñu lĕ mơnuih pơ ala brơi mơnuih ƀon sang; biă mă ñu lĕ hơdeč hmar, thâo pơčeh, pơplih phrâo amăng bruă krăo lăng, pel ĕp, tơña hăng lăi glăi tơlơi tơña mơng mơnuih ƀon sang, bưp mơnuih ƀon sang, pơgôp pơjing tơlơi phiăn.

Khua pơ ala mơnuih ƀon sang dêh čar ta ơ Vương Đình Huệ rơkâo, amăng rơwang thun 2021-2026, Jơnum min pơ ala mơnuih ƀon sang tơring čar Daklak tal X kiăng tŏ tui pơplih kơtang, hrưn đĭ klă hăng tŭ yua dong, tŏ tui ba tơring čar Daklak jing sa amăng hơdôm tơring čar pơđĭ kyar bơwih ƀong huă, pơhưč tuh pơ alin, ngă pơtrut hơdôm tơring čar amăng kual Dap kơdư.

Siu Đoan: Pơblang