VOV4.Jarai - Tŏ tui hơdôm hrơi mă bruă amăng Jơnum lok 2, Khua pơ ala mơnuih ƀon sang dêh čar tal XV, mơguah lơ 8/11, Khua pơ ala mơnuih ƀon sang dêh čar pơƀut ƀơi Ƀirô mă bruă, pơčrông sai kơ boh than ba glăi lơ̆m ngă tui akŏ bruă pơđĭ kyar bơwih ƀong huă-mơnuih mơnam thun 2021; prap lui akŏ bruă pơđĭ kyar bơwih ƀong huă - mơnuih mơnam thun 2022; lăi pơthâo kơ bruă pơgang klin Covid-19 hăng bruă ngă tui tơlơi pơsit mrô 30 mơng jơnum blung a, Khua pơ ala mơnuih ƀon sang dêh čar tal XV. Pơgôp hiăp kơ boh than ba glăi lơ̆m ngă tui akŏ bruă pơđĭ kyar bơwih ƀong huă - mơnuih mơnam thun 2021, lu khu mua brơi thâo, bruă tuh pơ ala bruă čar lĕ sa amăng hơdôm bruă yôm phun kiăng pơtruh pơđĭ kyar bơwih ƀong huă. Lu khua mua brơi thâo, kiăng hơkrŭ glăi hăng pơđĭ kyar dong amăng bơwih ƀong huă pơ anăp anai, kiăng kơ đing nao hơdôm hơdră djru anom bơwih ƀong sĭ mơdrô găn rơgao tơnap tap, hơđong tơlơi bơwih ƀong huă sĭ mơdrô.

Kơ bruă mă yua ngăn drăp kơnuk kơna thun 2021, him lăng mă yua ngăn drăp, kah pha ngăn drăp kơnuk kơna thun 2022, ƀing khua mua lăi pơtong: lơ̆m anai kiăng thâo pơkrem, ngă tui hơdră “hơmâo hơdôm hơƀơ̆i yua hơdôm anun”, hruă kjăp, wai lăng bruă pơhrui, mă yua ngăn drăp kơnuk kơna.

Siu Đoan: Pơblang