VOV4.Jarai - Tŏ tui hơdôm hrơi jơnum lok 2, mơguah hrơi anai, Khua pơ ala mơnuih ƀon sang dêh čar dong yua tơlơi pơsit kơ bruă mă yua ngăn drăp Kơnuk kơna thun 2022; hơdôm tơlơi pơsit kơ hơdră bruă yôm phun amăng pơđĭ kyar ƀôn prong Hải Phòng hăng hơdôm tơring čar Nghệ An, Thanh Hoá, Thừa Thiên Huế; Tơlơi pơsit kơ bruă mă yua lŏn mơnai dêh čar rơwang thun 2021-2030, anăp nao thun 2050 hăng akŏ bruă mă yua lŏn mơnai 5 thun 2021-2025. Tơdơi anun Khua pơ ala mơnuih ƀon sang dêh čar pơđut jơnum lok 2, Khua pơ ala mơnuih ƀon sang dêh čar tal XV. Amăng tlam tom brơi, lu khua mua tŭ ư, mă yua tơlơi pơsit kơ kơčăo bruă pơplih glăi bruă bơwih ƀong huă rơwang thun 2021-2025. Tui anun, hơnong pơkă truh thun 2025, gir run đơ đam dêh čar hơmâo giăm 1 klăk 500 rơbâo anom bơwih ƀong sĭ mơdrô, amăng anun hơmâo giăm 60.000 -70.000 boh anom bơwih ƀong sĭ mơdrô gah ƀrô hăng pơprong; rơnoh pơgôp amăng bruă bơwih ƀong huă pơdong mă pô amăng GDP giăm 55%. Tơlơi pơsit kơ kơčăo bruă pơplih glăi bruă bơwih ƀong huă rơwang thun 2021-2025 ba tơbiă: pơplih glăi bruă bơwih ƀong huă pơlir hăng pơplih rơnoh pơđĭ kyar kiăng pơhlôm pok prong hơđong, pơkra pơjing gơnam klă hloh hăng dưi bơkơtưn, dưi găn rơgao hơdôm tơlơi lông amăng bơwih ƀong huă. Tơlơi pơsit ba tơbiă hơdôm hơnong pơkă prong hloh truh thun 2025.

Siu Đoan: Pơblang