VOV4.Jarai - Mơguah (14/6), ƀơi Ƀirô Khua pơ ala mơnuih ƀon sang dêh čar pơphun jơnum lok 57 Jơnum min apăn bruă Khua pơ ala mơnuih ƀon sang dêh čar. Đĭ pơhiăp pơphun mông jơnum ơi Vương Đình Huệ lăi rơđah boh tơhnal yôm phun hơmâo Jơnum min apăn bruă Khua pơ ala mơnuih ƀon sang dêh čar  pơgôp hiăp amăng jơnum lok 57 lĕ lăng glăi boh than dưi ngă amăng pơđĭ kyar tơlơi bơwih ƀong huă - mơnuih mơnam hăng ngăn drăp Kơnuk kơna  6 blan akŏ thun laih dong hơdră bruă pơđĭ kyar bơwih ƀong huă - mơnuih mơnam, ngăn drăp kơnuk kơna amăng 6 blan rơnuč thun 2021.

Pơgôp hiăp amăng hră lăi pơthâo klah čun blung a kơ bruă plĕ hră ruah Khua pơ ala mơnuih ƀon sang dêh čar tal XV hăng Khua khul pơ ala mơnuih ƀon sang djop gưl rơwang thun 2021-2026, Khua pơ ala mơnuih ƀon sang dêh čar lăng yôm hơdôm tơlơi gum pơgôp mơng ƀing mơnuih apăn bruă anun lĕ ƀing nai ia jrao, ling tơhan, kông ang, Ping gah gong gai ƀon lan amăng bruă djru brơi tal plĕ hră; bruă mă yua boh thâo măi mok amăng tal plĕ hră; kah hăng bruă pơtô pơblang, lăi pơthâo kơ tal plĕ hră hơmâo pơphun tơpă sit, lăp djơ̆, ba glăi hrơi mông hur har mơ-ak mơng anun ba glăi tơlơi truh kih amăng tal plĕ hră.

Siu Đoan: Pơblang