VOV4.Jarai - Amăng tơlơi lăi pơthâo glăi bruă mơng rơwang bruă tal 14 mơng Khua pơ ala mơnuih ƀôn sang dêh čar ta pơsit: rơwang bruă rơgao hmâo truh kih hăng hơdôm bôh tơhnal kah hăng abih bang amăng hơdôm bruă mơng pơdŏng phiăn lăng tui, pơsit tơlơi yôm phăn mơng lŏn ia truh bruă pơtom hiăp khua pơ ala mơnuih ƀôn sang. Mơng anun, hmâo djru ngă brơi laih lŏn ia kơjăp yak rơgao tơlơi tơnap, pơjing hơdôm tơlơi pơplih klă, kơtang amăng tơlơi hơdip mơda bơwih ƀong – mơnuih mơnam, pơgang lŏn ia, rơnuk rơnua plơi pla, pơtom hiăp, pơplih hăng pơđĭ tui tơlơi hơdĭp mơda mơnuih ƀôn sang.

Rơwang bruă Khua pơ ala mơnuih ƀôn sang dêh čar ta tal 14 hmâo pơtrut kơtang hăng pơđĭ tui anô̆ kơjăp bruă pơdŏng tơlơi phiăn, pơjing gru than tơlơi phiăn ha amăng plĕ kơ tơlơi pơđĭ kyar tañ, kơjăp mơng lŏn ia. Amăng rơwang bruă phrâo rơgao, hăng 72 tơlơi phiăn, 2 phiăn pơtrun hăng lu tơlơi pơtrun pơsit hmâo tom rơwang pơkă tơlơi phiăn dưi pel ĕp hmâo pơjing laih tơlơi phiăn kơ bruă pơplih phrâo, pơđĭ tui bôh than, bôh tŭ yua bruă mă mơng kơnuk kơna; ngă tui tơlơi tơpă hăng tơlơi dưi mơng mơnuih ƀôn sang; pơtrut pơđĭ kyar bruă bơwih ƀong sĭ mơdrô pơsit jơlan gah mơnuih mơnam dưm kơnar.

Khua git gai wai lăng pơ ala mơnuih ƀôn sang dêh čar ta yă Nguyễn Thị Kim Ngân brơi thâo, bruă lăng tui dưi đing nao yôm, bôh yôm lăng tui hmâo tơhnal, djơ̆ bôh than, abih bang hơdôm bruă, jai hrơi jai pơđĭ tui bôh tŭ yua, bôh tơhnal, dưi hmâo lu bôh than yôm, dưi hmâo mơnuih ƀôn sang pơsit yôm. Hluai tui bruă lăng tui hmâo pơsit tơhnal djơ̆ mơng hơdră bruă, tơlơi phiăn, ngă tui dong hơdôm bruă ngă klă, hmao tlôn thâo ngă hơdư̆, akă gal. Lăng tui hluai tui akô̆ bruă kiăng dơlăm hloh, ba glăi bôh tơhnal hloh hăng 7 akô̆ bruă bơdjơ̆ nao pơđĭ kyar bơwih ƀong mơnuih mơnam hăng tơlơi hơdip mơda mơnuih ƀôn sang; hơdră pơphun dưi pơplih, jai hrơi jai hmâo akô̆ tlôn, juăt bruă.

“Tơña hăng lăi glăi tơlơi tơña hmâo dong lu tơlơi pơplih phrâo, biă ñu hơdră tơña tañ, rơguăt hmâo ngă gal brơi laih kiăng đĭ tui wot mrô khua pơ ala mơnuih ƀôn sang tơña, bơkơtuai, wot bôh yôm hăng anô̆ kơjăp tơlơi tơña, tơlơi lăi glăi, jing pơsuh, ngă pơhư̆č tơlơi đing nao pha ra mơng khua pơ ala mơnuih ƀôn sang, mơnuih pơ ala hăng mơnuih ƀôn sang đơ đam dêh čar. Bruă mă hră ruah hăng mơnuih ngă khua yua kơ Khua pơ ala mơnuih bôn sang dêh čar ta ruah ƀudah pơsit dưi ngă tui tơpă, djru ngă tui tơlơi tơpă amăng bruă mơng ƀirô mơnuih ƀôn sang ruah ăt kah hăng amăng tơlơi hơdip mơda mơnuih mơnam”.

Anom Diên Hồng – Sang phăt kơđi Khua pơ ala mơnuih ƀôn sang dêh čar Việt Nam

Khua pơ ala mơnuih bôn sang dêh čar ta tal 14 hmâo pel ĕp, pơsit lu hơdră pơsit yôm mơng lŏn ia, hmâo bơdjơ̆ nao prong truh tơlơi hơdip mơda bơwih ƀong – mơnuih mơnam, pơđĭ kyar kual čư̆ siăng neh wa djuai ania ƀiă, kĕ hrom hăng bruă pơhlôm lŏn ia pơgang dêh čar, rơnuk rơnua plơi pla, pơtom hiăp. Khua pơ ala mơnuih bôn sang dêh čar ta hmâo pơsit hơdră pơtrun tuh pơplai hơdôm rơwang bruă, ring bruă yôm phăn lŏn ia, hmâo bôh tŭ yua prong hăng tơlơi pơđĭ kyar bơwih bong – mơnuih mơnam mơng lŏn ia kah hăng pơdŏng sa dua črăn jơlan đuăi hmar hluh gah pơngŏ hăng dơnung gah Ngŏ mơng thun 2017-2020, hơdôm rơwang bruă mơng rơwang bruă tơdrun dŭ pơgiăng gơnam tam jar kơmar Long Thành; tơlơi pơsit pơdơi ngă tui hơdră pơtrun tuh pơplai rơwang bruă pơkĕ apui ayuh Ninh Thuận...

Bruă mơnuih mă bruă dưi pel ĕp, pơphun kơjăp, kơđiăng, djơ̆ glông bruă, djơ̆ hăng tơlơi kiăng sit hăng dưi čơkă mă tơlơi tŭ ư hrom prong. Bruă pel ĕp, pơsit pơdŏng, pơmut, pơplih pơkra anih anom hăng dưm dăp hơdôm anom bruă čar gưl tơring glông, gưl să ƀơi hơdôm bôh tơring čar, ƀôn prong hmâo djru pok pơhai ba glăi laih bôh tơhnal hơdră pơtrun mơng Ping gah, Tơlơi pơtrun pơsit mơng Khua pơ ala mơnuih bôn sang dêh čar ta kơ anô̆ rơguăt pơphun bruă, pơtrut pơđĭ kyar bơwih ƀong – mơnuih mơnam, pơhlôm pơgang lŏn ia, rơnuk rơnua, hơđong pơhlôm mơnuih mơnam ƀơi plơi pla. Ƀing khua pơ ala Khua pơ ala mơnuih bôn sang dêh čar ta ăt lĕ tơlơi tô nao rai yôm phăn kơplah wah Khua pơ ala mơnuih bôn sang dêh čar ta hăng mơnuih ƀôn sang hluai tui bruă hmư̆, lăi pơthâo sit pran gơgrong, tơlơi čang rơmang mơng mơnuih ƀôn sang kơ bruă mă ăt kah hăng lăi pơhing, ba mut hơdră bruă hăng tơlơi pơkă tơlơi phiăn amăng tơlơi hơdĭp mơda mơn. Khua git gai wai lăng pơ ala mơnuih ƀôn sang dêh čar ta yă Nguyễn Thị Kim Ngân pơsit:

“Rơwang bruă Khua pơ ala mơnuih bôn sang dêh čar ta tal 14 truh kih laih hăng hơdôm bôh tơhnal kah hăng abih bang hơdôm bruă mơng pơdŏng phiăn, lăng tui, pơsit tơlơi yôm phăn mơng lŏn ia truh pơtom hiăp khua pơ ala mơnuih ƀôn sang hmâo djru ngă brơi laih lŏn ia kơjăp yak rơgao tơlơi tơnap, jing hơdôm jơlan pơplih klă, kơtang amăng tơlơi hơdĭp bơwih ƀong – mơnuih mơnam, pơgang lŏn ia, rơnuk rơnua plơi pla, pơtom hiăp, pơplih pơkra hăng pơđĭ tui tơlơi hơdĭp mơnuih ƀôn sang, djru prong amăng hơdôm bôh than tŭ yua mơng bruă mă giăm truh 35 thun pơplih phrâo, ngă pơhrôh đĭ phiăn juăt 75 thun ư-ang mơng Khua pơ ala mơnuih bôn sang dêh čar ta”

Ƀrô djơ̆ tal anai, pơ ala kơ Khua pơ ala mơnuih bôn sang dêh čar ta, Khua git gai wai lăng pơ ala mơnuih ƀôn sang dêh čar ta yă Nguyễn Thị Kim Ngân pơdah pran jua thâo tơngia sit hăng dơlăm truh abih bang neh wa hăng mơnuih ƀôn sang đơ đam dêh čar hmâo đăo gơnang jao bruă yôm kơ khua pơ ala mơnuih ƀôn sang; tơlơi gum hrom, khul mơnuih gơgrong mơng Khua mir sir dêh čar, Kơnuk kơna, Jơnum min djop djuai ania mơnuih mơnam dêh čar Việt Nam, Sang phăt kơđi dêh čar, Anom pel ĕp kơđi tơlơi mơnuih ƀôn sang dêh čar ta, hơdôm ƀirô, khul grŭp bơdjơ̆ nao ăt kah hăng tơlơi gum hrom, djru gum mơng gơyut gơyâu jar kơmar./.

Siu H’ Prăk: Pô pơblang