VOV4.Jarai - Mơmot tom brơi (16/7), ƀơi Sang mă bruă Khua pơ ala mơnuih ƀôn sang Jơnum min apăn bruă Khua pơ ala mơnuih ƀôn sang hăng Jơnum min djop djuai ania mơnuih mơnam Việt Nam gum hrom pơphun Jơnum bruă mă mơng Jơnum min apăn bruă Khua pơ ala mơnuih ƀôn sang hăng Grŭp Khua Jơnum min djop djuai ania mơnuih mơnam Việt Nam. Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng Khua Jơnum min djop djuai ania mơnuih mơnam Việt Nam ơi Đỗ Văn Chiến gum hrom git gai mông jơnum. Amăng mông jơnum, ƀing khua pơ ala hmư̆ hơdôm tơlơi lăi pơthâo glăi hăng bơkơtuai kơ bruă gum hrom kơplah wah dua ƀirô amăng hơdôm hrơi rơgao ăt kah hăng ba tơbiă sa dua bôh yôm kiăng pơđĭ tui bruă gum hrom pơ̆ anăp anai. Pơhiăp klah čun, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, kiăng pơđĭ tui ba glăi bôh tơhnal bruă gum hrom kơplah wah Jơnum min apăn bruă Khua pơ ala mơnuih ƀôn sang hăng Jơnum min djop djuai ania mơnuih mơnam Việt Nam, jơnum tŭ ư hrom khom kơsem min tañ kiăng ngă giong tơlơi phiăn ruah khua, pơhlôm djơ̆ hăng tơlơi hmâo ba tơbiă./.

Siu H’ Prăk: Pô pơblang