VOV4.Jarai - Amăng tơlơi pơhiăp ƀơi anăp Khua mua pơ ala mơnuih ƀon sang, ƀrô hrơi pioh kơ Tơhan rơka tơhan djai pơsăn drơi kơ lŏn ia lơ 27/7/2021, Khua git gai pơ ala mơnuih ƀon sang ơi Vương Đình Huệ lăi, ngă klă hơdră djru kơ mơnuih hơkrŭ lŏn ia ta lĕ tơlơi khăp prong, tơlơi gơgrong bruă yôm mơng abih bang anom bruă čar, hăng abih bang mơnuih ƀon sang, ƀrô jing tơlơi pơhlôm brơi anŏ đĭ kyar, pơplih phrâo hăng dưm kơnar mơnuih mơnam, djru hơkrŭ kơjăp tui khul pơlir hơbit djuai ania ta,  pơđĭ tui tơlơi đăo gơnang mơng Mơnuih ƀon sang hăng Ping gah, Kơnuk kơna. Pơ ala kơ Khua mua, Khua git gai pơ ala mơnuih ƀon sang dêh čar ơi Vương Đình Huệ mơ-it kơ ƀing khua hơkrŭ đưm, ƀing amĭ Việt Nam sông kơtang, tơhan sông kơtang, tơhan blah ngă, tơhan sông kơtang mă bruă pơkra pơjing gơnam tam, ƀing tơhan rơka rơkač, sang anŏ tơhan djai pơsăn drơi, mơnuih hơkrŭ lŏn ia đưm hăng tơlơi tơña bla, khăp ƀu-eng abih bang pran jua. Khua git gai pơ ala mơnuih ƀon sang dêh čar ơi Vương Đình Huệ lăi, tơlơi djai brŭ, pơyơr pran jua prong prin mơng ơi yă ta đưm,  tơhan djai pơsăn drơi, tơhan rơka rơkač, sang anŏ tơhan rơka, mơnuih djru hơkrŭ lŏn ia lĕ pran jua yôm pơphăn, pơtrut tui pran jua kiăng abih bang Ping gah, mơnuih ƀon sang, ling tơhan dưi găn rơgao djŏp tơlơi lông, tơlơi tơnap, akŏ pơjing hăng pơđĭ kyar lŏn ia pơdrong asah, klă hiam./.

Siu H’Mai: Pơblang