VOV4.Jarai - Čơtlăm lơ 22/11, Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ klah čun tal jơnum lok 2 hăng gum pơhiăp kơ bruă prăp lui tal jơnum ƀu hmâo pơkă hlâo hăng tal jơnum lok 3, Khua pơ ala mơnuih ƀôn sang dêh čar ta tal 15. Amăng mông jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo grŭp pơphun bruă jai tañ jai klă tal jơnum ƀu hmâo pơkă hlâo hăng 5 bôh yôm phăn bơdjơ̆ nao truh “hơdră bruă lŏn ia, tơlơi hơdip mơnuih ƀôn sang”. Tui hăng Khua čih pioh Khua pơ ala mơnuih ƀôn sang dêh čar ơi Bùi Văn Cường: Tal jơnum ƀu hmâo pơkă hlâo pơphun tui hơdră lăng nao rai mơng ataih, pơkă hlâo 4 hrơi ha mơkrah pioh kơ bruă jơnum. Khua pơ ala mơnuih ƀôn sang dêh čar pơsit lăng glăi črăn dưm dăp amăng măi điện tử. Hmâo 5 bôh yôm Jơnum min apăn bruă Khua pơ ala mơnuih ƀôn sang dêh čar ta rơkâo Kơnuk kơna tañ lăi pơthâo kiăng gum pơhiăp amăng tal jơnum ƀu hmâo pơkă hlâo anun lĕ: pel ĕp Rơwang bruă Tơlơi phiăn pơplih pơkra, pơhrua nao dong sa dua tơlơi mơng 10 tơlơi phiăn; Rơwang bruă pơdŏng pơkra jơlan đuăi hmar Pơngŏ – Dơnung gah Ngŏ rơwang mơng 2021-2025; Hră čih pơkra Tơlơi pơtrun pơsit pơphô hlâo sa dua hơdră pơkă, hơdră bruă pha ra pơđĭ kyar ƀôn prong Cần Thơ; Akô̆ bruă pơdŏng hơdră pơkă, hơdră bruă gum djru prăk kak kiăng djru hmao tlôn pok pơhai Jơlan hơdră hơkrŭ glăi hăng pơđĭ kyar bơwih ƀong – mơnuih mơnam./.

Siu H’ Prăk: Pô pơblang