VOV4.Jarai - Mơguah lơ 12/10, Ping gah tơring čar Kontum pơphun Jơnum lok 5 Khul apăn bruă Ping gah tơring čar tal XVI pok prong hăng lu boh tơhnal yôm phăn. Tui tơlơi lăi pơthâo mơng mông jơnum, yua bơbeč mơng klin Covid-19 ngă kơ lu hơnong pơkă amăng bơwih ƀong huă - mơnuih mơnam amăng tơring čar Kontum 9 blan hrŏ trun anun lĕ: pơhrui ngăn drăp kơnuk kơna giăm 2.000 klai prăk, kơnong 59,2% tui tơlơi pơkă jao trun, mrô să dưi ngă pơgiong hơnong pơkă man pơdong plơi pla phrâo đĭ 1 boh să, dưm dưm 12,5% tui tơlơi pơkă; đang hmua pla phun akha kyâo phrâo pla rơngiao lơ sâm Ngọc Linh 960 ektar, dưm dưm 48% tui tơlơi pơkă….

Jơnum lok 5 khul apăn bruă Ping gah tơring čar Kontum tal XVI

Jơnum đing nao pơčrông sai, lăng glăi hăng tŭ yap hơdôm tơlơi pơsit yôm phun anun lĕ: Čih pơkra, pơhrua hơdôm tơlơi pơkă bruă mă mơng Ping gah tơring čar Kontum tal XVI; lăng glăi hơdôm tơlơi pơsit “kơ bruă tŏ tui pơjing hơdôm să tơnap tap hloh amăng rơnuk phrâo”; Lăng glăi hơdôm tơlơi pơsit “Amăng pơjing, pơđĭ kyar hơdôm gơnong bruă bơwih ƀong huă akŏ phun hăng gơnam sĭ nua yôm”…

Siu Đoan: Pơblang