VOV4.Jarai-Lơ 16/11, Khul đah kơmơi mut phung ƀôn prong Đà Nẵng, jơnum ruah khua khul tal XIV, rơwang bruă thun 2021-2026. 5 thun rơgao pơ klôn, khua mua, ƀing ding kơna khul đah kơmơi ƀôn prong hơmâo ngă lu bruă tŭ yua, djru hrom amăng bruă pơsir tơlơi bơwih ƀong huă mơnuih mơnam, tơlơi hơdip mơda, pơhrŏ ƀun rin. Lu bruă mă ƀing đah kơmơi djru nao rai bơwih ƀong huă, djru kơ ƀing đah kơmơi sang anŏ ƀun rin….dưi pok pơhai pơ djop anih.

Khul đah kơmơi mut phung ƀôn prong Đà Nẵng tŭ mă hla kơ Khua dêh čar bơni

Rĭm thun, djop gưl anom bruă đah kơmơi mut phung ƀôn prong Đà Nẵng hơmâo djru ba 5 rơbâo boh sang anŏ ƀun rin, sang anŏ giăm ƀun rin; hơdôm hơpluh rơbâo čô ding kơna đah kơmơi mut phung arăng pơtô brơi bruă mă, lăi pơthâo ĕp bruă mă hơđong. Khul đah kơmơi mut phung gơgrong brơi čan prăk 1.500 klai, kơ 50 rơbâo sang anŏ đah kơmơi dưi čan, pioh pơphun bruă mă hăng sĭ mơdrô.

Đĭ pơhiăp git gai mông jơnum, ơi Nguyễn Văn Quảng, Khua git gai ping gah ƀôn prong Đà Nẵng lăi, amăng rơwang bruă pơ anăp, Khul đah kơmơi mut phung ƀôn prong khom pơtrut tui bruă pơtô pơblang, jak iâu djop gưl anom bruă amăng khul đah kơmơi ngă klă jơlan hơdră, tơlơi pơtrun mơ̆ng Ping gah, tơlơi phiăn kơnuk kơna.

Nay Jek: Pơblang