VOV4.Jarai-Sa amăng hơdôm bruă mă čơkă hrơi mơak hơdor glăi tal 91 thun akŏ pơjing khul đah kơmơi mut phung Việt Nam hăng hrơi pơpŭ kơ đah kơmơi Việt Nam lơ 20/10, ƀơi plơi prong Kon Tum, Khul đah kơmơi mut phung tơring čar Kon Tum pơphun jơnum bơkơtuai djru đah kơmơi pơphun bruă mă, bơwih ƀong huă, sĭ mơdrô, čih anăn gơnam sĭ mơdrô lir hơbit hăng gơnam sĭ mơdrô OCOP laih anun klah čun tal pơplông đah kơmơi pơphun bruă mă thun 2021.

Lăi pơthâo gơnam pơkra ming pơphun bruă mă mơ̆ng khul đah kơmơi mut phung tơring čar Kon Tum ƀơi mông jơnum

Tơdơi kơ 4 thun ngă tui Kơčăo bruă “Djru đah kơmơi pơphun bruă mă mơ̆ng thun 2017-2025”, hơmâo 9 mơta tơlơi pơčeh phrâo pơphun bruă mă mơ̆ng đah kơmơi tơring čar Kon Tum dưi mă pri tal pơplông pơphun bruă mă yua mơ̆ng Khul đah kơmơi mut phung Việt Nam pơphun; djop gưl đah kơmơi mut phung amăng tơring čar hơmâo ngă hrom, ba 30 mơta tơlơi pơčeh phrâo ngă tui sit nik; djop gưl khul đah kơmơi mut phung, ƀing ding kơna đah kơmơi mut phung ngă hrom pơkra ming 34 mơta gơnam sĭ mơdrô OCOP ƀơi tơring čar.

Ƀơi mông jơnum, lu tơlơi pơgôp hiăp hơmâo ngă rơđah hloh kơ jơlan hơdră djru kơ đah kơmơi hrơi pơphun bruă mă; tơlơi thâo thăi amăng bruă hơduah ĕp anih anom sĭ mơdrô, ĕp bruă sĭ mơdrô, pôr pơthâo gơnam sĭ mơdrô mơ̆ng gơnam phrâo pơphun bruă mă.

Nay Jek: Pơblang