VOV4.Jarai - Vaccine pơgang klin Covid-19 glăk ba glăi pơ Việt Nam jai hrơi lu tui, samơ̆ lu djuai vaccine. Ding jum ia jrao kiăng kơ kah pah lăp djơ̆ brơi kơ rĭm tơring čar kiăng pơhlôm brơi bruă tlâ̆o vaccine tañ hloh tơdah dưi, biă mă ñu lĕ ƀơi hơdôm tơring čar kual Yŭ hăng kual Dap kơdư, anih glăk klin glăk dŏ lar hyu kơtang. Anai lĕ hơdôm bruă akŏ phun mơ̆ Khul git gai pơgang klin Covid-19 lăi pơtong amăng jơnum pơphun amăng mơguah tom brơi (3/11) ƀơi Ƀirô Kơnuk kơna, pơčrông sai kơ djop mơta bruă kiăng pơgang klin Covid-19 kjăp hloh. Kơ-iăng Khua dêh čar ta ơi Vũ Đức Đam, Kơ-iăng khua khul git gai dêh čar pơphun mông jơnum. Tui hăng Kơ-iăng khua dêh čar ơi Vũ Đức Đam, hơdră djop mơta anai hăng bruă phrâo amra ngă pơ anăp anai kiăng kơ tlâ̆o vaccine brơi abih bang mơnuih. Bơ amăng hơdôm hrơi anai kiăng ngă tui hơdră pơgang pơgăn kjăp, guang dar, pơčlah brơi lăp djơ̆, hơdeč hmar hăng aka ƀu lui hĭ hơdôm hơdră pơčlah tui tơlơi črâo trun mrô 16.

Siu Đoan: Pơblang